உடனடிச்செய்திகள்

Sunday, September 17, 2017

தமிழ்த்தேசியர்கள் பெரியாரை விமர்சித்ததுதான் சாதிப் படுகொலைகளுக்குக் காரணம் என்பது உண்மையா? வழக்கறிஞர் அருள்மொழிக்கு தமிழ்த்தேசியப் பேரியக்கத் தலைவர் பெ. மணியரசன் கேள்வி!

தமிழ்த்தேசியர்கள் பெரியாரை விமர்சித்ததுதான் சாதிப் படுகொலைகளுக்குக் காரணம் என்பது உண்மையா? வழக்கறிஞர் அருள்மொழிக்கு தமிழ்த்தேசியப் பேரியக்கத் தலைவர் பெ. மணியரசன் கேள்வி!
 
அண்மையில் மாணவி அனிதாவுக்கு இரங்கல் தெரிவித்த கூட்டத்தில் இயக்குநர் அமீர், வடநாட்டு ஊடகங்கள் அனிதாவை “தலித்” என்று உள்நோக்கத்தோடு பிரித்துப் பேசுகின்றன, அவர் தமிழ்ப்பெண், அவருடைய மரணம் – தமிழ்நாட்டுக்கு ஏற்பட்ட பேரிழப்பு என்று குறிப்பிட்டார். அப்போது கூட்டத்திலிருந்து பாய்ந்து மேடைக்கு வந்த இயக்குநர் ரஞ்சித், அமீரிடமிருந்து ஒலிவாங்கியைப் பிடுங்கிக் கொண்டு, “தமிழ், தமிழன் என்று சொல்லாதீர்கள், தமிழன் என்று சொல்லிக் கொண்டு சாதிக் கொடுமைகள் நடக்கின்றன, நாங்கள் தலித்துகள்” என்று ஆத்திரத்தோடு பேசினார். திரும்பத் திரும்ப மைக்கைப் பிடுங்கிக் கொண்டு, அமீரைப் பேசவிடாமல் தடுத்துவிட்டார். இதற்கு எதிர்வினையாக, தமிழ்த்தேசியர்கள் இயக்குநர் ரஞ்சித் கருத்துக்கு மறுப்புத் தெரிவித்து வருகின்றனர்.

இந்நிலையில், இந்து ஆங்கில நாளேடு இதுபற்றி இன்று (17.09.2017), ஒரு செய்தித் தொகுப்பு வெளியிட்டிருக்கிறது. அதில், கருத்துக் கூறிய திராவிடர் கழகப் பொறுப்பாளர்களில் ஒருவரான வழக்கறிஞர் அருள்மொழி அவர்கள், “மேல்சாதி பெண்களை திருமணம் செய்து கொண்டதற்காக தலித் இளைஞர்கள் கொல்லப்படுவது, இன்றைக்கு நடப்பதைப்போல் 1990களில் நடக்கவில்லை. இப்பொழுது படுகொலைகள் நடப்பதற்கானக் காரணம், தலித்தியர்களும், தமிழ்த்தேசியர்களும் பெரியாரை விமர்சித்ததுதான்! இதன் விளைவுதான் தருமபுரி நாயக்கன்கொட்டாய் தீ வைப்புச் சம்பவம் (2012)” என்று கூறியுள்ளார்.

திராவிடர் கழகத்தில் பன்முகப் பார்வையும், பண்பான விவாதமும் செய்யக்கூடியவர் வழக்கறிஞர் அருள்மொழி. ஆனால், மேற்கண்ட அவரது விமர்சனம் தன்நோக்குவாதம் (Subjectivism) சார்ந்ததாக உள்ளது. அவருக்கு சில கேள்விகள்!

1968இல் (25.12.1968), அண்ணா முதல்வராக இருக்கும்போது - பெரியார் தெம்பாகப் பரப்புரை செய்து கொண்டிருந்த காலத்தில், கீழவெண்மணியில் குழந்தைகள் உட்பட ஒடுக்கப்பட்ட வகுப்பினர் 44 பேர் – ஒரு குடிசையில் வைத்து, மேல்சாதியினரால் எரித்துக் கொல்லப்பட்டார்களே!

திராவிட ஆட்சியில் - பெரியாரின் பகுத்தறிவுப் பரப்புரை நடந்த காலத்தில் இது நடந்தது ஏன்? வெண்மணிப் படுகொலைக்கு உரியவாறு உடனடியாக ஒரு கண்டன அறிக்கைகூட பெரியார் அப்போது தரவில்லை என்பதும், அந்த கொடுமை நடந்த இடத்தை பெரியார் போய் பார்த்து – மக்களுக்கு ஆறுதல் கூறவில்லை என்பதும் கூடுதல் செய்தி!

அதேகாலத்தில் 1968 நவம்பர் 17 அன்று, நாகப்பட்டினம் சிக்கல் கடைத்தெருவில், ஒடுக்கப்பட்ட வகுப்பைச் சேர்ந்த பக்கிரிசாமி என்ற கம்யூனிஸ்ட் தோழர் பட்டப்பகலில் ஆதிக்கசக்திகளால் வெட்டிக் கொல்லப்பட்டார். அதுபோன்று ஒடுக்கப்பட்ட மக்களின் உரிமைக்குக் குரல் கொடுத்த பலர் அக்காலத்திலும் – அதாவது பெரியார் வாழ்ந்த காலத்திலும் படுகொலை செய்யப்பட்டுள்ளனர்.

பெரியார் ஆதரித்த காமராசர் ஆட்சி நடந்த காலத்தில், 1950களில் இராமநாதபுரம் மாவட்டத்தில் தீண்டாமைக் கொடுமை தலைவிரித்தாடியபோது, அதை எதிர்த்த இமானுவேல் சேகரனார் 11.09.1957 அன்று கொலை செய்யப்பட்டதும், பெரும் கலவரம் மூண்டதும் – ஏன் நடந்தது?
பெரியார் காங்கிரசு ஆட்சியை ஆதரித்துக் கொண்டிருந்த போதும், பிறகு தி.மு.க. ஆட்சியை ஆதரித்துக் கொண்டிருந்தபோதும் தாழ்த்தப்பட்டவர்களுக்கு தேநீர் கடைகளில் தனிக்குவளையில் தேநீர் கொடுத்த முறை – தமிழ்நாடெங்கும் பரவலாக - மிக அதிகமாக இருந்தது. அண்மைக்காலமாக ஒடுக்கப்பட்ட மக்கள் போராட்டத்தினாலும், பிற்படுத்தப்பட்ட மற்றும் முன்னேறிய வகுப்பிலுள்ள சனநாயக ஆற்றல்களின் பரப்புரையாலும் போராட்டத்தாலும் இரட்டைக் குவளை முறை பெருமளவு குறைந்துவிட்டது. இதுபற்றி வழக்கறிஞர் அருள்மொழி என்ன விடை சொல்கிறார்?

அண்மைக்காலங்களில் தலித் ஆண்கள் மேல்சாதிப் பெண்களை திருமணம் செய்து கொண்டதால், சில இடங்களில் அந்த ஆண்கள் கொலை செய்யப்பட்டிருக்கிறார்கள். இது பெரும் கொடுமை! தமிழினத்திற்கே அவமானம்! ஆனால், வழக்கறிஞர் அருள்மொழி கூறுகின்ற 1990கள் – அல்லது அதற்கு முந்தைய காலத்தைவிட, ஒடுக்கப்பட்ட வகுப்பு ஆண்கள் மேல்சாதிப் பெண்களைத் திருமணம் செய்து கொண்டு இல்லறம் நடத்தக்கூடிய நிகழ்வுகள் இப்பொழுது அதிகரித்துள்ளன என்ற உண்மையை மறுக்கிறாரா?

1980களுக்குப் பிறகு, தலித்திய – தமிழ்த்தேசியப் பரப்புரைகள் இல்லாத காலத்தில், தி.மு.க.வினர் தங்களுடைய குடும்பத் திருமண அழைப்புகளில் சாதிப் பட்டம் போட்டுக் கொள்ளத் தொடங்கினார்கள். சாதிச் சங்கங்களில் பொறுப்பேற்றார்கள். இதற்கெல்லாம் யார் காரணம்?

திராவிட முன்னேற்றக் கழகம், தனது கட்சியின் ஒன்றியச் செயலாளர் – மாவட்டச் செயலாளர் போன்ற பொறுப்புகளையும், தேர்தலில் போட்டியிடும் வேட்பாளர் வாய்ப்புகளையும் சாதி பார்த்துதான் ஒவ்வொரு பகுதியிலும் வழங்கியது. இப்போக்கு 1970களிலிருந்து மிகவும் தீவிரமடைந்தது. பொதுத் தொகுதிகளில் ஒடுக்கப்பட்ட வகுப்பினரை வேட்பாளராக தி.மு.க. நிறுத்துவதில்லை. ஆசிரியர் வீரமணியால் “சமூகநீதி காத்த வீராங்கனை” பட்டம் வழங்கிப் பாராட்டப்பட்ட செயலலிதாவின் அ.தி.மு.க.வும் இதையேதான் செய்தது. திராவிடக் கட்சிகளின் இந்த சாதியப் போக்கு தமிழ்த்தேசியம் தோன்றி பெரியாரை விமர்சிப்பதற்கு முன்பாகவே ஏற்பட்டுவிட்டது. இதற்கு யார் காரணம்?

வழக்கறிஞர் அருள்மொழி, தலித்தியர்களும் தமிழ்த்தேசியர்களும் பெரியாரை விமர்சித்ததால்தான் சாதிக் கொடுமைகள் அதிகரித்துவிட்டன என்று கூறுவது, பெரியாரிய சிந்தனையை ஏற்றுக் கொண்ட திராவிடக் கட்சிகளைவிட தலித்திய அமைப்புகளும் தமிழ்த்தேசிய அமைப்புகளும் சமூகச் செல்வாக்கோடு பெரும் அமைப்புகளாக வளர்ந்துள்ளனவா? அல்லது வழக்கறிஞர் கூறுவதுபோல், தலித்திய – தமிழ்த்தேசிய அமைப்புகள் பெரியாருக்கு எதிராக செய்யும் விமர்சனத்தை பின்னுக்குத் தள்ளக்கூடிய ஆற்றல் திராவிட இயக்கங்களுக்கு இல்லையா என்ற கேள்வியை எழுப்புகிறது.

சாதிய சங்கங்களும், ஒடுக்கப்பட்ட மக்களுக்கான வன்கொடுமைகளும் அதிகரித்ததற்கான காரணங்கள் என்று நாங்கள் பின் வருபவற்றை கருதுகிறோம்.

1960களில் தி.மு.க. குடும்பத்தினரின் திருமண அழைப்புகளில் மணமக்கள் பெற்றோர் பெயர்களில் பெரும்பாலும் சாதிப்பட்டம் இருக்காது. இப்பொழுது, தி.மு.க.வினர் சிறுவர்களாக உள்ள பேரக் குழந்தைகளின் பெயர்களில் கூட சாதிப்பட்டம் போட்டு திருமண அழைப்பிதழ்கள் அச்சடிக்கிறார்கள். இதுபோல் அவர்கள் எல்லா நிலைகளிலும் சாதியை முன்னிறுத்தும் போக்கு வளர்ந்திருக்கிறது.

அதைப்போலவே, திருமண அழைப்பிதழ்களில் கம்யூனிஸ்ட்டு கட்சியினரும் சாதி போடும் பழக்கம் இப்போது உருவாகியிருக்கிறது. இதற்கான காரணங்கள் :

1. 1960களில் தி.மு.க, இன விடுதலை – நாட்டு விடுதலை என்ற இலட்சியத்தை முன்வைத்து இயங்கியது. நாட்டு விடுதலையைக் கைவிட்டு, ஆட்சிக்கு வந்த பின் அதிகாரம் – ஊழல் என்ற நிலையில், தி.மு.க. சீரழிந்தது. இலட்சியமில்லாத அமைப்பின் பொறுப்பிலும், உறுப்பிலும் இருப்பவர்களிடையே சமூகச் சீரழிவுகள் தோன்றுவதும், அது தொற்றுநோய் போல் சமூகம் முழுவதும் பரவுவதும் இயல்பே!

அதைப்போல், இரசியப்புரட்சி – சீனப்புரட்சி போல் இங்கேயும் புரட்சி நடக்கப் போகிறது என்ற இலட்சியத்தை முன்வைத்து இயங்கிய கம்யூனிஸ்ட்டுக் கட்சிகள், அந்த இலட்சியத்தைக் கைவிட்டபிறகு, அதற்கு மாற்றாக வேறொரு புதிய இலட்சியத்தை முன்வைக்காத நிலையில் - அதன் உறுப்பினர்களிடையே சீரழிவு ஏற்பட்டது.

திராவிடர் கழகத்தைப் பொறுத்தவரை, எல்லா ஆளும் கட்சியையும் ஆதரித்து வந்திருக்கிறது. அரசியல் முடிவுகளில் மிகவும் பிற்போக்காக, சீரழிவு சக்திகளுடன் கூட்டு சேர்ந்து கொண்டு, தனிப்பட்ட பரப்புரையில் மட்டும் கடவுள் மறுப்பு – பார்ப்பன ஆதிக்க எதிர்ப்பு என்று பேசுவதென்பது ஒரு தன் முரண்பாடு! அந்த தன் முரண்பாட்டுப் பரப்புரை, பெரிய பயன் தராது.

அத்துடன், பெரியார் காலத்திலும் சரி, அவருக்குப் பிந்தைய காலத்திலும் சரி, பார்ப்பன ஆதிக்க எதிர்ப்பையே முதன்மைப்படுத்தி – பார்ப்பனரல்லாதோரிடம் உள்ள சாதி ஒடுக்குமுறையை – பார்ப்பன எதிர்ப்பு அளவுக்கு இல்லாவிட்டாலும் உரிய அளவுக்கு முக்கியத்துவம் கொடுத்து திராவிடர் கழகம் பரப்புரை செய்யவில்லை!

இவையும், இன்னும் சிலவும் தமிழ்நாட்டுக்குள் உள்ள காரணங்கள்!

2. இதற்கு மேல், இந்தியத்தேசியம் என்பது ஆரியவாதம் மற்றும் பார்ப்பனிய வாதம்தான்! காங்கிரசு ஆட்சியிலும் பா.ச.க. ஆட்சியிலும் இந்த ஆரியப் பார்ப்பனியவாதம்தான், அரசு அதிகாரத்தோடு செயல்படுகிறது. மீண்டும் மீண்டும் வெவ்வேறு வழிகளில் வர்ணசாதி வலியுறுத்தப்படுகின்றன!

இந்த இந்திய ஆரியக் கட்டமைப்புக்குள் இருந்து வெளியேறுவதற்கு, திராவிடர் கழகம் எதுவும் செய்யவில்லை! பெரியார் காலத்திலும், அதற்குப் பிறகும் இந்தியத்தேசியவாதிகளை தொடர்ந்து ஆதரித்தே வந்திருக்கிறது. இன்றும், காங்கிரசோடு கூட்டணி போல் தி.க. செயல்படுகிறது.

வர்ணசாதிப் பிளவுகளிலும், அவை தொடர்வதிலும், சாதி ஒடுக்குமுறைகளிலும் இந்தியத்தேசிய ஆளும் வர்க்க சக்திகள் மூலகாரணமாக விளங்குகின்றன. இவற்றின்பால், திராவிடர் கழகத்தின் அணுகுமுறை என்ன?

தமிழ்த்தேசியம் – இந்தியத்தேசியத்தை மறுக்கிறது. தமிழ்த்தேசியம் முன்வைக்கும் தமிழர் அறம், “மனிதர்கள் அனைவரும் சமம், தமிழர்கள் அனைவரும் சமம்” என்கிறது. சாதி மதம் கடந்த சமத்துவம் மட்டுமல்ல, ஆண் – பெண் சமத்துவமும் தமிழர் அறத்தில் உள்ளது என்பதை தமிழ்த்தேசியவாதிகளாகிய நாங்கள் பரப்புரை செய்கிறோம். மக்களிடம் கொண்டு சேர்க்கிறோம்.

ஒடுக்கப்பட்ட – மிகவும் பிற்படுத்தப்பட்ட - பிற்படுத்தப்பட்ட - முன்னேறிய வகுப்புகளின் தமிழர்கள் அனைவரும் பத்தாயிரம் ஆண்டுகளுக்கு முன்பிருந்து ஒரே இனத்தைச் சேர்ந்தவர்களாக வரலாற்றில் வாழ்ந்து வருகிறோம். நம் முன்னோர்கள் அனைவரும் ஓர் இனத்தின் மூலவர்கள்! தமிழ்ச் சாதி அனைத்திற்கும் – தாய்மொழி தமிழ்! திருவள்ளுவப்பேராசான், கணியன் பூங்குன்றன், கரிகால்சோழன், சேரன் செங்குட்டுவன், பாண்டியன் நெடுஞ்செழியன் போன்றோர், இன்று ஒடுக்கப்பட்ட மக்களாக உள்ள தமிழர்கள் உள்ளிட்ட அனைத்துத் தமிழ் மக்களுக்கும் பொதுவானவர்கள்; நம்முடைய மூலவர்கள்!

ஆரியத்தின் வர்ணாசிரமம் கற்பித்த – பிறப்பால் உயர்வு தாழ்வு என்ற சாதிக் கொடுமைகள் பிற்காலத்தில் புகுந்து, நம்மைச் சீரழித்துவிட்டன. நம் இனம் தோன்றி வளர்ந்திருந்த அந்த காலத்து சமத்துவத்தை மீட்போம் என்ற இனவழிப்பட்ட இயற்கையான உறவு உணர்ச்சியை நாங்கள் தமிழர்களிடம் எடுத்துக் கூறி, ஒற்றுமைக்கான எல்லா முயற்சிகளையும் செய்து வருகிறோம். அதேவேளையில், சாதி ஒடுக்குமுறைக்கும் தீண்டாமைக்கும் எதிராக பரப்புரை மட்டுமின்றி, அங்கங்கே போராட்டங்களும் செய்து வருகிறோம்.

தமிழைக் காட்டுமிராண்டி மொழி என்றும், தமிழைப் படிக்காதே ஆங்கிலத்தையே படி என்றும் கூறியதோடு, தமிழினம் என்று சொல்வது குறைபாடுடையது – திராவிட இனம் என்பதே சரி என்று இல்லாத திராவிட இனத்தை – தமிழ்நாட்டுத் தமிழர்கள் மீது திணித்தது போன்ற பெரியாரின் பிழைகளை தமிழ்த்தேசியவாதிகள் விமர்சிப்பது குற்றமா? பெரியாரின் கருத்துகளைத்தான் பெரும்பாலான தமிழ்த்தேசியவாதிகள் விமர்சிக்கின்றனர். அவர் தமிழர் அல்லாதவர் என்பதை முதன்மைப்படுத்துவதில்லை! தமிழ் இனத்தில் பிறக்கவில்லை என்பதை அவருக்கான தகுதிக் குறைவாக தமிழ்த்தேசியப் பேரியக்கம் கருதவில்லை.

எங்களுடைய தமிழ்த்தேசியம் வளர்ச்சி பெற்று, முழு வீச்சில் மக்களிடையே செல்வாக்கு பெறும்போது, சாதி அடையாளங்கள் பின்னுக்குத் தள்ளப்படும். தமிழர்களிடையே ஒற்றுமை பெருமளவு ஏற்படும் என்பதை உறுதியாக நம்பலாம்!

இதற்கான முன்னோட்டம்தான், ஜல்லிக்கட்டு உரிமைப் போராட்டத்தில் சாதி கடந்து குமரி முனை முதல் கும்மிடிப்பூண்டி வரை தமிழர் என்ற உணர்ச்சியில் ஒன்று திரண்டது. இப்பொழுது, அனிதா உயிரிழப்புக்கு தமிழ்நாடு முழுக்க இரங்கல் தெரிவித்து ஆர்ப்பாட்டங்கள் நடத்துவதும், நீட் தேர்வை எதிர்த்துப் போராடுவதும் தமிழ் இன உணர்ச்சியோடுதான் நடைபெறுகிறது என்பதை கவனிக்க வேண்டும்.
தலைமைச் செயலகம்,
தமிழ்த்தேசியப் பேரியக்கம்
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

Friday, September 15, 2017

அபுதாபியில் “நீட்” தேர்வுக்கு எதிராக அறவழி ஆர்ப்பாட்டம்!

அபுதாபியில் “நீட்” தேர்வுக்கு எதிராக அறவழி ஆர்ப்பாட்டம்!
தமிழ்த்தேசியப் பேரியக்கத்தின் அபுதாபி கிளை சார்பில், இன்று (15.09.2017) காலை, அபுதாபியில், தமிழர் கல்வி உரிமையைப் பறிக்கும் “நீட்” தேர்வுக்கு எதிராக அறவழி ஆர்ப்பாட்டம் நடைபெற்றது.
 
அபுதாபி - பனியாஸ், முஸ்த்தப்பா உழைப்பாளி கிராமத்தில், தமிழ்நாட்டிலிருந்து அபுதாபி சென்று பணிபுரியும் தமிழர்களை ஒருங்கிணைத்து நடைபெற்ற இந்த ஆர்ப்பாட்டத்திற்கு, கிளைச் செயலாளர் செயலாளர் தோழர் கார்த்திக் கிருஷ்ணசாமி தலைமை தாங்கினார். துணைச் செயலாளர் தோழர் ருபன் கினிஸ்ட்டன் உள்ளிட்டோர் பங்கேற்றனர்.
 
இந்திய அரசே! தமிழர் இன உரிமையைப் பறிக்கும் “நீட்” தேர்வைக் கைவிடு! தமிழினத்தை வஞ்சிக்காதே!
 
தலைமைச் செயலகம்,
தமிழ்த்தேசியப் பேரியக்கம்
 
 
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

Thursday, September 14, 2017

இயக்குநர் ரஞ்சித்துக்கு.. தோழர் பெ. மணியரசன்.

இயக்குநர் ரஞ்சித்துக்கு..பெ. மணியரசன், தலைவர் - தமிழ்த் தேசியப் பேரியக்கம்.


 
''எங்களை இந்தியன் என்று சொல்லாதீர்கள் 'தலித்' என்று சொல்லுங்கள் என காங்கிரஸாரிடமோ அல்லது பி.ஜே.பி-யினரிடமோ ரஞ்சித் கேட்பாரா?
 
'திராவிடன்' என்று சொல்லிக்கொண்டிருக்கும்போதே, வெண்மணிப்படுகொலை நடக்கிறது, தெருவுக்கு நடுவே சுவர் கட்டப்படுகிறது... அப்போதெல்லாம், 'எங்களைப் பார்த்து திராவிடன் என்று சொல்லாதீர்கள்' என்று தி.மு.க-வினரைப் பார்த்துக் கேட்டிருக்கிறாரா?
 
தமிழன் என்றால் மட்டும் ஏன் எதிர்க்கிறார்?
 
ரஞ்சித்தினுடைய தாய்மொழியும் என்னுடைய தாய்மொழியும் தமிழ்தான்! சாதி என்பது தமிழர்களிடையே பிற்காலத்தில் வந்த ஒரு சீர்குலைவு. ஆரிய உபநிடதங்களும் வேதங்களும்தான் இந்த வர்ணாசிரம பாகுபாபாடுகளுக்கெல்லாம் அடிப்படைக் காரணம். பாமர மக்களை ஏமாற்றுவதற்காகத்தான் அவர்கள் இப்போது 'இந்து' என்ற ஒற்றைச் சொல்லில் ஒருசேரச் சொல்லி ஏமாற்றிவருகிறார்கள். அது இந்துத்துவா அல்ல... ஆரியத்துவா என்று நாங்கள்தான் மக்களிடையே எடுத்துச் சொல்லிவருகிறோம்.
 
பெரியார் பெயரைச் சொல்லி தமிழ்நாட்டில் கட்சி வளர்த்தவர்கள்தான் எம்.எல்.ஏ., மாவட்ட செயலாளர், வட்ட செயலாளர் என்று எல்லா பதவிகளையும் சாதி பார்த்தே கொடுக்கிறார்கள்.
 
நாமெல்லாம் ஒருதாய் வயிற்றுப் பிள்ளைகள்தான். உனக்கும் எனக்கும் மூல பேராசான் திருவள்ளுவர்தான். நமது தாய் மண் தமிழகம் என்பதையெல்லாம் நாங்கள்தான் எடுத்துச்சொல்லி வருகிறோம். 'பிறப்பொக்கும் எல்லா உயிர்க்கும்' என்று நாமெல்லோரும் ஒன்றாக இருந்ததற்கான சான்றுகள் தமிழ் இலக்கியத்தில் இருக்கின்றன.
 
மனதில் அழுக்கில்லாமல் இருத்தல், மனிதர்கள் அனைவரும் சமம், தமிழர்கள் அனைவரும் சமம் என்ற மூன்று தமிழர் அறத்தைத்தான் நாங்களும் தொடர்ந்து வலியுறுத்தி வருகிறோம். மனிதர்கள் அனைவரும் சமம் என்று சொல்வதில், ஆண் - பெண்ணும் சமம் என்ற அர்த்தம் உள்ளடங்கியிருக்கிறது. அதனால்தான் சங்க இலக்கியத்திலேயே தலைவன் - தலைவி என்று வர்ணித்தார்கள். குடும்ப நலத்தைக்கூட 'இல்லறம்' என்று அறத்தோடு சேர்த்து வலியுறுத்திய இலக்கியம் தமிழைத் தவிர வேறு உலக மொழிகள் எவற்றிலாவது உண்டா?
 
ஆக, இப்படியெல்லாம் சமமாக உரிமையோடு வாழ்ந்தவர்களின் வழித்தோன்றல்கள்தான் நாம் எல்லோரும். அந்த சமநிலையை மறுபடியும் மீட்டெடுக்கவேண்டுமானால், இடையில் ஏற்படுத்தப்பட்ட தாழ்த்தப்பட்டவர், பிற்படுத்தப்பட்டவர் என்ற வேறுபாட்டையெல்லாம் தூக்கி எறிந்துவிட்டு நாமெல்லோரும் "தமிழராய்" ஒன்றுபட வேண்டியது அவசியம் என்பதைத்தான் நாங்கள் தெளிவாக வலியுறுத்திவருகிறோம். எத்தனை சாதிக் கிளைகளாக இன்று நாம் பிளவுப்பட்டுக் கிடந்தாலும் அடிமரத்து வேர் என்பது நமக்கு தமிழ்தான். இதுதான் நம்மை உளவியல் ரீதியாக ஒன்றிணைக்கும்.

தொழிற்சாலைகளை எல்லாம் அரசுடைமையாக்கிவிட்டால், முதலாளித்துவத்தை ஒழித்துவிடலாம். நிலத்தையெல்லாம் கையகப்படுத்தி கூட்டுப் பண்ணைகளை உருவாக்கிவிட்டால், நிலப் பிரபுத்துவத்தை ஒழித்துவிடலாம்.
 
ஆனால், "எதை எடுத்து சாதியை ஒழிப்பீர்கள்?"
 
அதற்கு மனதளவில் அல்லவா மெள்ள மெள்ள மாற்றம் வரவேண்டும்; வாழ்வுரிமையில் சமத்துவம் வரவேண்டும். இப்படி ஒவ்வொன்றாக உதிர்ந்துபோகக்கூடியதுதான் சாதி என்றக் கட்டமைப்பு. மற்றபடி உடனடியாக, நம்மிடையே இருக்கும் சாதி அழுக்கை ஒரே நாளில், தேதி குறித்து களைந்துவிட முடியாது. எனவே, சாதி ஒழிப்புக்கான பண்பாட்டு மாற்றங்கள், போராட்டங்களை எங்களது தமிழ்த் தேசியம்தான் செய்துகொண்டிருக்கிறது'' என்றார் உறுதியான குரலில்.
 
 
பெ. மணியரசன்,
தலைவர் - தமிழ்த் தேசியப் பேரியக்கம்.
 
 

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

Tuesday, September 12, 2017

“மண்ணின் மக்களுக்கு வேலை வழங்கு” நடுவண் அரசு அலுவலகங்களில் ஒருவாரம் காத்திருப்புப் போராட்டம்! தமிழ்த்தேசியப் பேரியக்கம் சிறப்புப் பொதுக்குழு தீர்மானம்!

“மண்ணின் மக்களுக்கு வேலை வழங்கு” நடுவண் அரசு அலுவலகங்களில் ஒருவாரம் காத்திருப்புப் போராட்டம்! தமிழ்த்தேசியப் பேரியக்கம் சிறப்புப் பொதுக்குழு தீர்மானம்!
தமிழ்த்தேசியப் பேரியக்கத்தின் எட்டாவது பொதுக்குழுக் கூட்டம், ஓசூரில் 10.09.2017, 11.09.2017 ஆகிய இரு நாட்கள் எழுச்சியுடன் நடைபெற்றது.

தமிழ்த்தேசியப் பேரியக்கத் தலைவர் தோழர் பெ. மணியரசன் மற்றும் தோழர்கள் ம. இலட்சுமி, சுப்பிரமணிய சிவா ஆகியோர் இருநாள் சிறப்புப் பொதுக்குழுக் கூட்டத்திற்குத் தலைமைக் குழுவினராகச் செயல்பட்டு நெறிப்படுத்தினர். பேரியக்கப் பொதுச் செயலாளர் தோழர் கி. வெங்கட்ராமன் முன்னிலை வகித்தார்.

பொருளாளர் தோழர் அ. விடியல் (எ) ஆனந்தன், தலைமைச் செயற்குழு உறுப்பினர்கள் ஓசூர் கோ. மாரிமுத்து, க. அருணபாரதி, குழ. பால்ராசு, நா. வைகறை, பழ. இராசேந்திரன், க. விடுதலைச்சுடர், இரெ. இராசு, க. முருகன் உள்ளிட்டோரும், பொதுக்குழு உறுப்பினர்களும் சிறப்பு அழைப்பாளர்களும் இருநாள் கூட்டத்திலும் கலந்து கொண்டனர். அரியலூர் மாணவி அனிதா, காவிரிக்காக உயிரீகம் செய்த விக்னேசு, ஓவியர் வீரசந்தானம் உள்ளிட்டோருக்கும், அண்மையில் மறைந்த பேரியக்கத் தோழர்களுக்கும் இரங்கல் தெரிவித்து, அமைதி வணக்கம் செலுத்தப்பட்டது.

சிறப்புப் பொதுக்குழுவில் பின்வரும் தீர்மானங்கள் நிறைவேற்றப்பட்டன.

தீர்மானம் 1 - “மண்ணின் மக்களுக்கு வேலை வழங்கு” - நடுவண் அரசு அலுவலகங்களில் ஒரு வாரம் காத்திருப்புப் போராட்டம்

தமிழ்நாட்டில் செயல்படும் இந்திய அரசு நிறுவனங்களான பி.எச்.இ.எல், நெய்வேலி அனல் மின் நிலையம், ஆவடி, திருச்சி, அரவங்காடு ஆகிய பகுதிகளில் உள்ள ஆயுதத் தொழிற்சாலைகள், நரிமணம், பனங்குடி, வெள்ளக்குடி, குத்தாலம், எண்ணூர் முதலிய இடங்களில் உள்ள பெட்ரோலியம் மற்றும் எரிவளி ஆலைகள், துறைமுகங்கள், வானூர்தி நிலையங்கள், தொடர்வண்டித்துறை, அஞ்சல் துறை, தொலைப்பேசித்துறை, அரசுடைமையாக்கப்பட்ட வங்கிகள், வருமான வரி, உற்பத்தி வரி, சுங்க வரி அலுவலகங்கள் உள்ளிட்ட அனைத்திலும் திட்டமிட்டுத் தமிழர்கள் புறக்கணிக்கப்பட்டு, எண்பது விழுக்காடு அயல் மாநிலங்களைச் சேர்ந்தவர்களை வேலைக்குச் சேர்க்கிறார்கள்.

இதுதவிர, தமிழ்நாட்டில் வசிப்போர் என்று போலிச் சான்றிதழ் பெற்று அயல் மாநிலத்தவர் பலர் தமிழ்நாடு அரசின் அலுவலகங்கள், தொழிற்சாலைகள் மற்றும் உயர்கல்வி நிலையங்களில் வேலையிலும் கல்வியிலும் சேர்க்கிறார்கள். இதற்கான அண்மைக்கால எடுத்துக்காட்டு “நீட்” தேர்வின் மூலம் தமிழ்நாட்டு ஒதுக்கீட்டில் அயல் மாநில மாணவர்கள் பலர் தமிழ்நாடு அரசு மருத்துவக் கல்லூரிகளில் சேர்க்கப்பட்டிருக்கிறார்கள்.

எட்டுக்கோடி மக்கள் தொகை கொண்ட தமிழ்நாட்டில் படித்து வேலையில்லாமல் துன்புறுவோர் ஏராளம்! தமிழ்நாட்டு வேலை வாய்ப்பு அலுவலகங்களில் வேலை கோரி பதிவு செய்துள்ள மண்ணின் மகன்கள், மண்ணின் மகள்கள் எண்ணிக்கை ஒரு கோடி! இந்தியாவிலேயே தமிழ்நாட்டில்தான் மிக அதிகமாகப் பொறியியல் கல்லூரிகள் இருக்கின்றன. அவற்றில் படித்து பட்டம் பெற்ற இலட்சக்கணக்கான இளைஞர்கள் வேலையில்லாமல் _ மன உளைச்சல்களுக்கும் மன அழுத்தத்திற்கும் உள்ளாகித் தவிக்கிறார்கள். அவர்களில் பலர் தொழிலகங்களின் வாயில் காப்போர்களாக வேலை பார்க்கிறார்கள். அவ்வேலையிலும் வெளி மாநிலத்தவர் ஆக்கிரமிப்பு மிக அதிகமாகிப் போட்டி கடுமையாக உள்ளது.

இந்தியாவில் மொழிவழித் தாயகங்கள் அரசமைப்புச் சட்டப்படி உருவாக்கப்பட்டுள்ளன. இந்த ஏற்பாடு தமிழ்நாடு தமிழர்களின் தேசிய இனத் தாயகம் என்ற சட்ட ஏற்பாகும். தமிழ்நாட்டின் கல்வி, வேலை வாய்ப்பு முதலியவை மண்ணின் மக்களாகியத் தமிழர்களுக்குப் பயன்பட வேண்டும் என்ற நோக்கில்தான் மொழிவழி ஆட்சி மாநிலமாகத் தமிழ்நாடு 1956 நவம்பர் 1-இல் வடிவமைக்கப்பட்டது. இந்திய அரசமைப்புச் சட்டத்தின் இந்த நோக்கத்திற்கு எதிராக, இந்திய அரசு அனைத்திந்தியத் தேர்வு என்பதைப் பயன்படுத்திக் கொண்டு தமிழ்நாட்டில் நடுவண் அரசுத் தொழிலகங்கள், அலுவலகங்கள், ஐ.ஐ.டி. போன்ற உயர்கல்வி நிலையங்கள் அனைத்திலும் வெளி மாநிலங்களைச் சேர்ந்தவர்களையே எண்பது விழுக்காடு அளவிற்குச் சேர்த்து வருகிறது.

அண்மையில் தமிழ்நாட்டு அஞ்சலகப் பணிகளுக்காக அனைத்திந்தியத் தேர்வெழுதியோரில் அரியானா மாநிலத்தவர் 25க்கு 25 என்ற அளவில் தமிழ்ப் பாடத்தில் மதிப்பெண் வாங்கிய மோசடி அம்பலமானது. ஆவடி எச்.வி.எப் - ஆயுதத் தொழிற்சாலையில் வடநாட்டவர்கள் போலிச் சான்றிதழ் கொடுத்து வேலையில் சேர்ந்தது கண்டுபிடிக்கப்பட்டது. தொடக்க காலத்தில் பி.எச்.இ.எல்., நெய்வேலி, ஆவடித் தொழிலகங்களுக்கு தமிழ்நாடு வேலைவாய்ப்பு அலுவலகங்கள் வழியாகத்தான் தமிழர்கள் பணியில் சேர்க்கப்பட்டார்கள்.

மண்ணின் மக்களின் வேலை உரிமையைப் பாதுகாப்பதற்காக 1980களில் கர்நாடகக் காங்கிரசு ஆட்சி சரோஜினி மகிசி ஆணையம் அமைத்து பரிந்துரை பெற்றது. அப்பரிந்துரையின்படி மாநில அரசுத் தொழிலகங்களில் 100க்கு 100 கன்னடர்களுக்கே வேலை தர வேண்டும். இந்திய அரசு நிறுவனங்களில் ஊழியர்கள் 90 விழுக்காடும், உயர் அதிகாரிகள் 80 விழுக்காடு _- 70 விழுக்காடு என்றும் படிநிலையில் கன்னடர்களுக்கு வேலை வழங்க வேண்டும். தனியார் துறையிரும் கன்னடர்களுக்கே முன்னுரிமை தர வேண்டும் என அப்பரிந்துரை கூறுகிறது. கர்நாடகத்தில் காங்கிரசு, பா.ச.க. ஆட்சிகளால் அப்பரிந்துரை செயல்படுத்தப்படுகிறது.

தமிழ்நாடு அரசு கர்நாடகத்தில் இருப்பது போல் தமிழ்நாட்டின் மண்ணின் மக்களுக்கு - மாநில அரசு, நடுவண் அரசு, தனியார் துறை ஆகியவற்றில் வேலை ஒதுக்கீடு வழங்கி சட்டமியற்ற வேண்டும்.

தமிழ்நாட்டில் உள்ள அனைத்து நடுவண் அரசு தொழிலகங்கள் மற்றும் அலுவலகங்களில் 90 விழுக்காடு வேலை தமிழர்களுக்கு உடனடியாக வழங்க வேண்டும் என்று வலியுறுத்தியும் 10 விழுக்காட்டிற்கு மேல் உள்ள வெளி மாநிலத்தவரை உடனடியாக வெளியேற்ற வலியுறுத்தியும் 2017 அக்டோபர் 25 முதல் 31 வரை ஒருவார காலம் நடுவண் அரசு தொழிலகங்கள் மற்றும் அலுவலகங்கள் முன் மண்ணின் மக்கள் அமர்ந்து காத்திருப்புப் போராட்டம் நடத்துவது என்று தமிழ்த்தேசியப் பேரியக்கத்தின் சிறப்புப் பொதுக்குழு ஒருமனமாக முடிவு செய்துள்ளது.

மண்ணின் மக்கள் வாழ்வுரிமைக்காக நடைபெறும் இக்காத்திருப்புப் போராட்டத்தில் கட்சி மற்றும் இயக்க வேறுபாடின்றி அனைத்துத் தமிழ் மக்களும் கலந்து கொள்ளுமாறு இப்பொதுக்குழு அன்புரிமையுடன் கேட்டுக் கொள்கிறது.

தீர்மானம் 2 - உச்ச நீதிமன்றம், தமிழக உழவர்களைக் காவிரி வழக்கில் சேர்த்துக் கொள்ள வாய்ப்பளிக்க வேண்டும்!

உச்ச நீதிமன்றத்தில் நடைபெற்று வரும் காவிரி வழக்கை தமிழ்நாடு அரசு, முழுமையான அக்கறையோடு நடத்தவில்லை. தமிழர்களின் சார்பாக வாதிட வேண்டிய தமிழ்நாடு அரசு, இந்திய அரசின் அரசியல் அழுத்தங்களால் உரிமைகளை விட்டுக் கொடுக்கவும் முயல்கிறது. காவிரி வழக்கின் போக்கைத் திசைமாறச் செய்யும் வகையில் கர்நாடகம் கிளப்பும் பொய்களுக்கும், இந்திய அரசின் வஞ்சகத்திற்கும் தமிழ்நாடு அரசு வளைந்து கொடுக்கிறது.

எனவே, காவிரி வழக்கில் தமிழர்களுக்காக வாதிட “காவிரி உரிமை மீட்புக் குழு”வுக்கு வாய்ப்பளிக்க வேண்டுமென கடந்த ஆகத்து 21 அன்று உச்ச நீதிமன்றப் பதிவாளருக்கு காவிரி உரிமை மீட்புக் குழு ஒருங்கிணைப்பாளர் தோழர் பெ. மணியரசன் கடிதம் எழுதினார். தமிழர்கள் பலரும் அவ்வாறே உச்ச நீதிமன்றத்துக்கு மின்னஞ்சல்கள் அனுப்பினர். அதற்கு, உச்ச நீதிமன்றம் இதுவரை எவ்வித பதிலையும் அளிக்கவில்லை.

எனவே, உச்ச நீதிமன்றம் தமிழ்நாடு உழவர்கள் சார்பில் வாதிட “காவிரி உரிமை மீட்புக் குழு”வை காவிரி வழக்கில் சேர்த்துக் கொள்ள வேண்டுமென இச்சிறப்புப் பொதுக்குழு வலியுறுத்திக் கேட்டுக் கொள்கிறது.

தீர்மானம் 3 - தஞ்சைத் தமிழ்ப்பல்கலைக்கழகத்தில் இந்தித் திணிப்பு - கேந்திரிய வித்தியாலயா பள்ளியை அனுமதிக்கக் கூடாது!

தமிழ் வளர்ச்சிக்காக உருவாக்கப்பட்ட தஞ்சைத் தமிழ்ப்பல்கலைக்கழகத்தில், இந்திய அரசின் இந்தித் திணிப்புப் பள்ளியான கேந்திரியா வித்தியாலயா பள்ளி தொடங்கப்படுவதாக ஊடகங்களில் வெளிவந்துள்ள செய்து, கடும் அதிர்ச்சியையும் வேதனையையும் ஏற்படுத்தியுள்ளது.

தமிழ்ப் பல்கலைக்கழகத்தில், கேந்திரிய வித்தியாலயா சி.பி.எஸ்.இ. பள்ளி அமையவுள்ள இடத்தை தஞ்சை மாவட்ட ஆட்சியர், அ.தி.மு.க. நாடாளுமன்ற உறுப்பினர் கு. பரசுராமன் மற்றும் தமிழ்நாடு அரசு அதிகாரிகள் குழுவாகச் சென்று பார்வையிட்டுள்ளனர்.

உலகின் முதன்மொழியான தமிழுக்கு உலகிலுள்ள ஒரே பளல்கலைக்கழகம், தஞ்சையிலுள்ள தமிழ்ப் பல்கலைக்கழகமாகும். 1981 செப்டம்பர் 15 அன்று, தமிழ்நாடு முதலமைச்சர் எம்.ஜி.ஆர். அவர்கள், இப்பல்கலைக்கழகத்தைத் தொடங்கி வைத்தார். 25 துறைகளின் உயராய்வுக்காக தொடங்கப்பட்ட இப்பல்கலைக்கழகத்திற்கு, 972 ஏக்கர் அரசு நிலத்தையும் எம்.ஜி.ஆர். வழங்கினார்.

ஆனால், எம்.ஜி.ஆருக்குப் பிறகு வந்த தி.மு.க. - அ.தி.மு.க. அரசுகள் தொடர்ந்து தமிழ்ப் பல்கலைக்கழகத்தின் நிலத்தை தமிழ் வளர்ச்சி அல்லாத பிறப் பயன்பாடுகளுக்கு திருப்பி விடும் பணிகளை செய்து வருகின்றன. தமிழ்ப் பல்கலைக்கழகத்தையும் முறையாக நடத்தாமல் சீரழித்து வருகின்றனர்.

முதலில், தமிழ்ப் பல்கலைக்கழகத்தின் மூலிகைப் பண்ணையின் 25 ஏக்கர் நிலத்தை இந்திய அரசின் தென்னகப் பண்பாட்டு மையத்திற்கு வழங்கியது தமிழ்நாடு அரசு. அதன்பின், 50 ஏக்கர் நிலத்தை தமிழ்நாடு வீட்டு வசதி வாரியத்திற்கு அளித்தது. அங்கு இப்போது வீடு கட்டி, தனியாருக்கு வழங்கப்படுகிறது. அதன்பின், 2012இல் தஞ்சை மாவட்ட ஆட்சியர் மற்றும் மாவட்டக் காவல் கண்காணிப்பாளர் அலுவலகத்திற்காக தமிழ்ப் பல்கலைக்கழகத்தின் 62 ஏக்கர் நிலம் வழங்கப்பட்டது.

இப்போது, அதையெல்லாம் விட மோசமாக இந்தி - சமற்கிருதத் திணிப்பில் ஈடுபட்டு வரும் சி.பி.எஸ்.இ. கேந்திரிய வித்தியாலயா பள்ளிக்கே - தமிழ்ப் பல்கலைக்கழகத்தில் இடமளிக்கப்பட்டுள்ளது, கடும் கண்டனத்திற்குரியது!

இந்திய அரசின் இந்தி - சமற்கிருதத் திணிப்புகளை எதிர்ப்பதாகக் கூறிக் கொள்ளும் தமிழ்நாடு ஆட்சியாளர்கள், அதற்கு நேர் முரணாக இந்திய அரசின் இந்தி - சமற்கிருதத் திணிப்புக் கருவிகளாக விளங்கும் சி.பி.எஸ்.இ. பள்ளிகளுக்கு அனுமதி வழங்குவது அயோக்கியத்தனமானது!

உடனடியாக தமிழ்நாடு அரசு, இத்திட்டத்தைக் கைவிட வேண்டும்! தமிழ்ப் பல்கலைக்கழகத்திற்குள் மட்டுமல்ல, தமிழ்நாட்டில் எங்குமே இந்தி - சமற்கிருதத் திணிப்பு கேந்திரிய வித்தியாலயா பள்ளிகளை அனுமதிக்கக் கூடாது என இச்சிறப்புப் பொதுக்குழு தமிழ்நாடு அரசை வலியுறுத்திக் கேட்டுக் கொள்கிறது.

தீர்மானம் 4 - நீட் தேர்விலிருந்து தமிழ்நாட்டுக்கு நிரந்தர விலக்கு அளிக்க வேண்டும்!

தமிழ்நாட்டின் மருத்துவக் கல்லூரிகளில் வெளி மாநில மாணவர்களைக் கொண்டு வந்து திணித்து, தமிழ்நாட்டின் மண்ணின் மக்களை புறக்கணிக்கும் நோக்கோடு கொண்டு வரப்பட்டுள்ள “நீட்” - அகில இந்தியத் தேர்வுக்கு எதிராக தமிழ்நாடெங்கும் மாணவர்களின் தன்னெழுச்சிப் போராட்டங்கள் நடைபெற்று வருகின்றன.

”நீட் தேர்வை விரும்பாத மாநிலங்களுக்கு விலக்கு அளிக்கலாம்” என கடந்த 2016ஆம் ஆண்டு, இந்திய நாடாளுமன்ற நிலைக்குழுவின் 92ஆவது அறிக்கையில் தெரிவிக்கப்பட்டுள்ளது. “மாடர்ன் பல் மருத்துவக் கல்லூரி - எதிர் - மத்தியப்பிரதேச மாநில அரசு” வழக்கில் தீர்ப்பளித்த - ஐந்து நீதிபதிகள் கொண்ட உச்ச நீதிமன்ற அரசமைப்பு ஆயம் வழங்கிய தீர்ப்பிலும் இது உறுதி செய்யப்பட்டது. இந்நிலையில், அவற்றை யெல்லாம் குப்பையில் வீசிவிட்டு இந்திய அரசும், உச்ச நீதிமன்றமும் சட்ட விரோதமாக நீட் தேர்வை தமிழ்நாட்டின் மீது திணித்துள்ளன.

அதை எதிர்த்து முறியடிப்பதற்கு மாறாக, மோடி அரசின் எடுபிடியாக நிற்கும் தமிழ்நாட்டின் எடப்பாடி பழனிச்சாமி அரசு, தமிழ்நாட்டு மாணவர்களின் மருத்துவக் கல்விக் கனவில் நெருப்பை வீசி விளையாடின. இதன் விளைவாகவே, அரியலூர் மாணவி அனிதா உயிரீகம் செய்தார். அவரின் ஈகம் தமிழ்நாட்டு மாணவர்களையும், மக்களையும் உலுக்கியெடுத்துள்ள நிலையில், தன்னெழுச்சிப் போராட்டங்களால் தமிழ்நாடு போர்க்களமாகியுள்ளது.

இச்சூழலைப் பயன்படுத்தியாவது, தமிழ்நாடு அரசு கடந்த 31.01.2017 அன்று நீட் தேர்விலிருந்து தமிழ் நாட்டுக்கு விலக்கு அளிக்கக் கோரி தமிழக சட்டப்பேரவையில் நிறைவேற்றப்பட்ட சட்ட முன்வடிவுக்கு, இந்திய அரசிடம் ஒப்புதலைப் பெற உறுதியான முயற்சிகளை மேற்கொள்ள வேண்டும், தமிழ்நாட்டு மாணவர்களின் எதிர்காலத்தைப் பாதுகாக்க வேண்டும் என இச்சிறப்புப் பொதுக்குழு தமிழ்நாடு அரசை வலியுறுத்திக் கேட்டுக் கொள்கிறது!

தீர்மானம் 5 - கடலூர் - நாகை கிராமங்களை அழித்துக் கொண்டு வரப்படும் பெட்ரோ கெமிக்கல் மண்டலத் திட்டத்தை இந்திய அரசு கைவிட வேண்டும்!
கதிர்வீச்சு அபாய அணு உலைகள், காற்று மண்டலத்தையும் உயிர் வாழும் சூழலையும் நாசப்படுத்தும் அனல் மின் நிலையங்கள், நிலத்தடி நீரை உறிஞ்சி பாலைவனமாக்கும் பெட்ரோல், எரிவளி (மீத்தேன்) எடுப்பு முயற்சிகள், நியூட்ரினோ ஆய்வகம், வேளாண் நிலங்களை அழிக்கும் கெயில் குழாய்த் திட்டம் என இந்திய அரசால் தமிழ்நாட்டின் மீது தொடர்ச்சியாகத் திணிக்கப்பட்டு வரும் அழிவுத் திட்டங்களில் ஒன்றாக, கடலூர் _- நாகை மாவட்டத்தில் எரிமவேதிப் பொருட்கள் முதலீட்டு மண்டலம் அறிவிக்கப்பட்டுள்ளது.

கடலூர் - நாகை மாவட்டங்களின் 45 கிராமங்களில் சற்றொப்ப 57,345 ஏக்கர் நிலத்தில் அமைக்கப்படவுள்ள இந்த முதலீட்டு மண்டலத்தில், நச்சுக்காற்றையும், மனித உயிருக்குக் கேடு விளைவிக்கும் வேதிப் பொருட்களையும் பெரும் தொழிற்சாலைகளை உள்ளடக்கிய புதிய நகரியம் அமைக்கப்படும் என தமிழ்நாடு அரசு அறிவித்துள்ளது.

இந்த எரிவேதி மண்டலத் திட்டம் கடலூர், புவனகிரி, சிதம்பரம், சீர்காழி, தரங்கம்பாடி வட்டங்களில் உள்ள 45 கிராமங்களை தனியார் நிறுவன வளாகமாக மாற்றி, இலட்சக்கணக்கான குடும்பங்களை காலங்காலமாக வாழ்ந்த மண்ணிலிருந்து வெளியேற்றும்.

ஏற்கெனவே சிப்காட் தொழிற்சாலைகளால் கடும் மாசுபாடுகளாலும், நிலத்துக்குள் கடல் நீர் புகுவதும் அதிகரித்துள்ள கடலூர் - நாகை மாவட்டங்களில், இந்த புதிய முதலீட்டு மண்டலம் நிலைமையைத் தீவிரமாக்கி, மக்களை நிரந்தர நோயாளிகளாக்கி விடும்.

இந்த எரிவேதி மண்டலத் திட்டம் என்பது ஏற்கெனவே மேற்கு வங்கத்தாலும், கேரளாவாலும் தங்கள் மண்ணிலிருந்து விரட்டியடிக்கப்பட்ட திட்டமாகும். அதைத் தமிழ்நாட்டின் மீது திணிப்பது இந்திய அரசின் தமிழினப் பகைப் போக்கையே வெளிப்படுத்துகிறது.

எனவே உடனடியாக இத்திட்டத்தைக் கைவிட வேண்டுமென இச்சிறப்புப் பொதுக்குழு இந்திய - தமிழ்நாடு அரசுகளைக் கோருகிறது!

இத்திட்டத்தை எதிர்த்து, இக்கிராம மக்களைத் திரட்டி மண்ணுரிமை காக்கும் போராட்டத்தை முன்னெடுப்பது என தமிழ்த்தேசியப் பேரியக்க சிறப்புப் பொதுக்குழு முடிவு செய்கிறது.

தீர்மானம் 6 - தென்பெண்ணைக் கிளைவாய்க்கால் திட்டத்தை உடனே நிறைவேற்றுக!

கிருட்டிணகிரி மாவட்டத்தின் தென்பெண்ணை ஆற்றுக் கரையோரப் பகுதிகளான உத்தனப்பள்ளி, இராயக்கோட்டை உள்ளிட்ட 12 ஊராட்சிகளில் உள்ள 52 கிராமங்களில், தொடர்ந்து பல ஆண்டுகளாக வறட்சியாலும், முறையான நீர் நிலைப் பராமரிப்பின்மையாலும் நிலத்தடி நீர்மட்டம் 1000 அடிக்குக் கீழ் சென்றுவிட்டது. அதன் காரணமாக குடிநீருக்கும் வேளாண்மைக்கும் நீரின்றி மக்கள் தவித்து வருகின்றனர்.

பருவமழைக் காலங்களில் தென்பெண்ணை ஆற்றில் வெள்ளப் பெருக்கு ஏற்பட்டால்கூட, இப்பகுதிகளில் தண்ணீர் செல்வதற்கு வழி ஏற்படுத்தும் கிளைவாய்க்கால் திட்டத்தை செயல்படுத்தாததால், அத்தண்ணீர் வீணாகச் சென்று கடலில் கலக்கும் நிலை உள்ளது.

எனவே, இப்பகுதி மக்கள் பயன்பெறும் வகையில், இங்குள்ள கருக்கநல்லி, பெரிய எள்ளி, குட்டை, கீழ் ஏரி, மேல் ஏரி, இராசப்பன் குட்டை உள்ளிட்ட 12 ஏரி - குளங்களை இணைக்கும் வகையில் தென்பெண்ணைக் கிளைவாய்க்கால் திட்டத்தை செயல்படுத்த வேண்டுமெனக் கோரி தமிழக உழவர் முன்னணி சார்பில் தொடர்ச்சியாக நடத்தப்பட்ட மக்கள் இயக்கத்தின் விளைவாக, தமிழ்நாடு அரசு அத்திட்டத்தை ஏற்றுக் கொண்டு, சாத்தியக்கூறு ஆய்வுகளையும் மேற்கொண்டது.

2012 - 2013ஆம் ஆண்டு இத்திட்டத்தைச் செயல்படுத்த 22.20 கோடி ரூபாய் தேவைப்படும் எனவும் தமிழ்நாடு அரசு மதிப்பிட்டது. எனினும் திட்டம் செயல்படுத்தவில்லை. அரசின் கால தாமதத்தால், திட்ட மதிப்பீட்டுத் தொகை ஆண்டுதோறும் உயர்ந்து கொண்டே வருகிறது. 2014 - 20தீர்மானம் 15ஆம் ஆண்டு இம்மதிப்பீட்டுத் தொகை 29 கோடியே 50 இலட்சம் ரூபாயாக அதிகரித்தது.

எனவே, தமிழ்நாடு அரசு தென்பெண்ணை கிளைவாய்க்கால் திட்டத்தை இனியும் தாமதிக்காமல் நடப்பு ஆண்டிலேயே உடனடியாகச் செயல்படுத்தி, இப்பகுதிகளில் பல்லாண்டுகளாக நிலவும் குடிநீர் மற்றும் வேளாண் சிக்கல்களுக்குத் தீர்வு காண வேண்டும் என இச்சிறப்புப் பொதுக்குழு தமிழ்நாடு அரசை வலியுறுத்திக் கேட்டுக் கொள்கிறது!

தீர்மானம் 7 - அரசு ஊழியர்களின் போராட்டத்தை அடக்குமுறையால் ஒடுக்கக் கூடாது!

ஊழியர்களின் ஓய்வூதிய நிதியை பங்குச்சந்தைகளில் போட்டு சூதாட வழி வகுக்கும் புதிய பென்சன் திட்டத்தை செயல்படுத்தக் கூடாது, ஏழாவது ஊதியக் குழுவின் பரிந்துரைகளின்படி ஞாயமான ஊதிய உயர்வை அளிக்க வேண்டும் ஆகிய கோரிக்கைகளை முன்வைத்து, தமிழ்நாடு அரசு ஊழியர்கள் சங்கங்களின் கூட்டமைப்பான “ஜாக்டோ - ஜியோ” அமைப்பினர் தொடர் போராட்டங்களில் ஈடுபட்டு வருகின்றனர்.

இப்போராட்டங்களில் ஈடுபட்ட ஒரு இலட்சத்திற்கும் மேற்பட்ட அரசு ஊழியர்களுக்கும், ஆசிரியர்களுக்கும் தமிழ்நாடு அரசு குற்றச்சாட்டு ஆணை (மெமோ) வழங்கியுள்ளது. அவர்களது ஞாயமான கோரிக்கைகளுக்கு செவிசாய்க்க வேண்டிய தமிழ்நாடு அரசு, அவர்களை அடக்குமுறைகளால் அச்சுறுத்திக் கொண்டிருப்பது வன்மையாகக் கண்டிக்கத்தக்கது. தமிழ்நாடு அரசு இந்த அடக்குமுறை நடவடிக்கைகளைக் கைவிட வேண்டும்.

அரசு ஊழியர்கள் - ஆசிரியர்கள் போராட்டக் குழுவோடு தமிழ்நாடு அரசு முறையாக சுமூகப் பேச்சுவார்த்தை நடத்தி, அவர்களது எதிர்காலத்தைப் பாதுகாக்க வேண்டுமென இச்சிறப்புப் பொதுக்குழு தமிழ்நாடு அரசை வலியுறுத்திக் கேட்டுக் கொள்கிறது!
 
நாள் : 11.09.2017
இடம் : ஓசூர்
 
தலைமைச் செயலகம்,
தமிழ்த்தேசியப் பேரியக்கம்
 
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

Friday, September 8, 2017

பிரான்சு, கனடா நாடுகளில் எரி எண்ணெய் எடுக்கத் தடை: தமிழ்நாட்டிலிருந்து ஓ.என்.ஜி.சி.யை வெளியேற்ற வேண்டும்! தோழர் கி. வெங்கட்ராமன் வலியுறுத்தல்!

பிரான்சு, கனடா நாடுகளில் எரி எண்ணெய் எடுக்கத் தடை: தமிழ்நாட்டிலிருந்து ஓ.என்.ஜி.சி.யை வெளியேற்ற வேண்டும்! தமிழ்த்தேசியப் பேரியக்கப் பொதுச் செயலாளர் தோழர் கி. வெங்கட்ராமன் வலியுறுத்தல்!
பாரீசு பருவநிலை மாநாட்டு ஒப்பந்தத்தை நிறைவேற்றும் வகையில், பிரான்சு அரசாங்கம் அந்நாட்டில் எரி எண்ணெய் (பெட்ரோலியம்), எரிவளி (எரிவாயு) எடுப்பதை படிப்படியாகக் குறைத்து, 2040க்குள் எரி எண்ணெய் – எரிவளி எடுப்பதை முற்றிலுமாகக் கைவிடுவது என முடிவு செய்து அதற்கான தடைச் சட்டத்தை 2017 செப்டம்பர் 6 அன்று பிறப்பித்திருக்கிறது. 

தங்களது மின்சாரம், எரிபொருள் மற்றும் எரிவளித் தேவைக்கு இயற்கையோடு இயைந்த மாற்று வழிகளை கடைபிடிக்கப் போவதாக பிரான்சு அரசாங்கம அறிவித்திருக்கிறது. “தூய மின்சாரம்” என்ற பெயரால், அணு மின்சாரம் எடுப்பதையும் கொள்கை அளவில் கைவிட முடிவு செய்துள்ள அந்நாட்டு அரசு, இப்போது அந்நாட்டு மின்சாரத் தேவையில் 75 விழுக்காட்டு மின்சாரம் அணு உலையிலிருந்து வருவதை 50 விழுக்காடாக குறைக்க முடிவு செய்துள்ளது. 

அதேபோல், கனடா நாட்டு – கியூபெக் மாகாண அரசு, தனது செயின்ட் லாரன்சு (Gulf of Saint Lawrence) வளைகுடா பகுதியில் உள்ள அன்டிகோஸ்டீ (Anticosti) தீவிலும் அதை சுற்றியுள்ள கடல் பரப்பிலும் எண்ணெய் எடுப்பதை கைவிடுவது என 2017 சூலையில் அறிவித்திருக்கிறது. 

மின்சார நுகர்வு மிகையாக உள்ள இந்த மேற்கத்திய நாடுகளே எரி எண்ணெய் எடுப்பதைக் கைவிடும்போது, தமிழ்நாட்டில் அவ்வாறு செய்வது இயலாத செயல் அல்ல! 

பிரான்சு, கனடா நாடுகளைவிட கோடைக் காலம் அதிக மாதங்கள் உள்ள வெப்ப மண்டல பகுதியான தமிழ்நாட்டில், அந்நாடுகளைவிட கதிரவன் மின்சாரம் கிடைப்பது ஏராளம்! இன்று வளர்ந்து வரும் தொழில்நுட்பம் காரணமாக, கதிரவன் மின்சார உற்பத்திக்கு ஆகும் செலவும் வேகமாகக் குறைந்து வருகிறது. நிலக்கரியிலிருந்து மின்சார உற்பத்தி செய்வதைவிட கதிரவன் மின்சாரத்திற்கான உற்பத்திச் செலவு குறைவு! காற்றையும் மண்ணையும் நீரையும் மாசுபடுத்தி மக்கள் வாழ்வை சீரழிக்காதது!

அதேபோல், மாநகராட்சி, நகராட்சி உள்ளிட்ட உள்ளாட்சி அமைப்புகள் அப்பகுதிகளில் சேரும் திடக்கழிவை மேலாண்மை செய்ய முடியாமல் தவித்து வருவதற்கு விடையாக, கழிவிலிருந்து மின்சாரமும் எரிவாயுவும் உற்பத்தி செய்வதே அமையும். 

இவையன்றி, காற்றாலை மின்சாரம், கடல் அலை மின்சாரம் போன்ற ஏராளமான வாய்ப்புகள் மேற்சொன்ன நாடுகளைவிட தமிழ்நாட்டில் அதிகம். 

அந்தந்த பகுதிகளிலும் 2 மெகா வாட் அல்லது 3 மெகா வாட் அளவிற்கு மிகாத சிறு சிறு உற்பத்தி அலகுகளை இந்த மாற்று வழிகளில் அமைத்துக் கொள்ள முடியும். மின்சாரமும் எரிவளியும் கிடைக்கிற இடங்களைச் சுற்றியே அவற்றின் பயன்பாட்டையும், வழங்கலையும் வைத்துக் கொண்டால், கம்பி இழப்பு – குழாய் வழி இழப்பு போன்றவற்றை வெகுவாகக் குறைக்க முடியும். 

இவ்வாறான மாற்று மின்சார – எரிவளி உற்பத்தி நிறுவனங்கள் இப்போது இருப்பதைவிட பல மடங்கு வேலை வாய்ப்பையும் வழங்குகின்றன. இச்சிறு நிறுவனங்களை ஊராட்சி - நகராட்சி போன்ற உள்ளாட்சி அமைப்புகளே நிர்வாகம் செய்து கொள்ள முடியும். அதிகாரக் குவிப்பையும் தவிர்க்க முடியும்! 

ஓ.என்.ஜி.சி. எண்ணெய் – எரிவளி எடுக்கிற பகுதிகளிலும், நெய்வேலி நிலக்கரி சுரங்கத்தை சுற்றிலும், நிலக்கரி கையாளும் காரைக்கால் துறைமுகப் பகுதிகளைச் சுற்றிலும் கொடும் மாசுபாடு ஏற்பட்டு மக்களின் அன்றாட வாழ்வுரிமை பறிக்கப்படுவதை பொறுக்க முடியாமல் மக்கள் போராடி வருகிறார்கள். 

இவை அனைத்தையும் கருத்தில் கொண்டு, மின்சாரம் எரிவளி தேவைக்கு இயற்கையோடு இயைந்த மாற்று வழிகளை பிரான்சு - கனடா நாடுகளைப் போல தமிழ்நாடும் மேற்கொள்ள வேண்டும். 

உடனடியாக, ஓ.என்.ஜி.சி.யை தமிழ்நாட்டை விட்டு வெளியேற்றும் அறிவிப்பை தமிழ்நாடு அரசு வெளியிட வேண்டும் என்றும், பேரழிப்பு அணு உலைகளை அனுமதிக்கக் கூடாது என்றும் தமிழ்த்தேசியப் பேரியக்கம் சார்பில் வலியுறுத்துகிறேன். 

தலைமைச் செயலகம், 
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com 

Thursday, September 7, 2017

மாணவி அனிதா உயிரீகத்தை ஏளனம் செய்த இந்திய மகளிர் ஆணையத் தலைவர் லலிதா குமாரமங்கலத்தை வன்மையாகக் கண்டிக்கிறோம்! தோழர் அருணா கண்டன அறிக்கை!

மாணவி அனிதா உயிரீகத்தை ஏளனம் செய்த இந்திய மகளிர் ஆணையத் தலைவர் லலிதா குமாரமங்கலத்தை வன்மையாகக் கண்டிக்கிறோம்! மகளிர் ஆயம் ஒருங்கிணைப்பாளர் தோழர் அருணா கண்டன அறிக்கை!
 
மாணவி அனிதா மரணம் என்பது அவரது தலையெழுத்து என்றும், ஒவ்வொரு மாநிலத்தவரும் அவரவர் மொழிகளை வலியுறுத்தினால் “தேசம்” என்னாவது என்றும் கூறி அனிதாவின் மரணத்தை சிறுமைப்படுத்திய தேசிய மகளிர் உரிமை ஆணையத் தலைவர் லலிதா குமாரமங்கலம் கூற்றை மகளிர் ஆயம் சார்பில் வன்மையாகக் கண்டிக்கிறேன்.
 
நேற்று (06.09.2016) பத்திரிக்கையாளரும் சமூக செயல்பாட்டாளருமான கவுரி லங்கேஷ் அம்மையார் படுகொலை குறித்து விசாரிப்பதற்காக பெங்களூர் சென்ற லலிதா குமாரமங்கலத்திடம் “நியூஸ்18” செய்தியாளர், அனிதா மரணம் குறித்து கருத்து கேட்டபோது, அவர் இவ்வாறு அலட்சியமாகக் கூறினார்.
நீதிமன்றத் தீர்ப்பின் விளைவாக அனிதா மரணமடைந்திருப்பதால், அது குறித்து மகளிர் ஆணையம் விசாரிக்க முடியாது என்று கூறிய லலிதா குமாரமங்கலம், “அவர் படித்திருந்தால் தேர்ச்சி பெற்றிருக்கலாம். ஒவ்வொருவருக்கும் தலையில் எழுதியிருக்கிறது இல்லையா? அதுபோல் அந்தப் பெண் இறந்துவிட்டார்” என்றும், “தெலுங்கு மாநிலத்தவர்கள் எனக்கு இந்தி தெரியாது என்று சொல்லலாம். அப்படியே போனால் தேசம் என்னாவது?” என்றும் கூறினார்.
 
“இந்தியத்தேசம்” என்ற பெயரால் தமிழ்நாட்டின் ஒட்டு மொத்த சோகத்தையும் “தலையெழுத்து” என்று எள்ளி நகையாடுகிறார். தமிழ்நாட்டு உரிமையை குறிப்பாக தமிழ்நாட்டு மாணவர்களின் கல்வி உரிமையை இந்தியத்தேசியம் என்ற பெயரால், “பாரதமாதா” பலி கொண்டு விட்டாள் என்பதையே லலிதா குமாரமங்கலத்தின் பேச்சு உறுதி செய்கிறது.
 
கட்சி அரசியலுக்கும், அரசாங்கத்திற்கும் அப்பால் மகளிர் உரிமையைப் பாதுகாப்பதற்கான கண்காணிப்பு அமைப்பாக செயல்பட வேண்டிய “மகளிர் ஆணையம்” தமிழ்நாட்டு பெண்களின் உரிமை என்றால் எப்படி நடந்து கொள்ளும் என்பதற்கு லலிதா குமாரமங்கலத்தின் பேச்சு சான்றாக இருக்கிறது.
 
“நீட்” தேர்வை எதிர்த்து அழுத்தமாகப் போராடி உயிரீகம் செய்த மாணவி அனிதாவின் சாவை ஏளனம் செய்த, ஒட்டுமொத்தத் தமிழ்நாட்டு மக்களை இழிவுபடுத்திய மகளிர் ஆணையத் தலைவி லலிதா குமாரமங்கலத்திற்கு மகளிர் ஆயத்தின் கடும் கண்டனத்தைத் தெரிவித்துக் கொள்கிறேன்.
  
இன்னணம்,
அருணா
ஒருங்கிணைப்பாளர், மகளிர் ஆயம்.
இடம்: மதுரை
 
செய்தித் தொடர்பகம்,
மகளிர் ஆயம்.

தொடர்புக்கு:
7373456737, 9486927540
முகநூல்: fb.com/makaliraayam
 
 



Wednesday, September 6, 2017

மாணவி அனிதாவுக்கு வீரவணக்கம்! “நீட்” தேர்வு – சமூகநீதி மறுப்பு மட்டுமல்ல! தமிழர் இன உரிமை – தாயக உரிமை மறுப்பும் ஆகும்! தஞ்சையில் 07.09.2017 மாலை 5.30 மணி - கண்டன ஆர்ப்பாட்டம்!

மாணவி அனிதாவுக்கு வீரவணக்கம்! “நீட்” தேர்வு – சமூகநீதி மறுப்பு மட்டுமல்ல! தமிழர் இன உரிமை – தாயக உரிமை மறுப்பும் ஆகும்! தஞ்சையில் நாளை கண்டன ஆர்ப்பாட்டம்!
 இடம்                          :     சூப்பிட்டர் திரையரங்கம் எதிரில்
காலம்                        :     07.09.2017 வியாழன் மாலை 5.30 மணி
கண்டன உரை : தோழர் பெ. மணியரசன், தலைவர், தமிழ்த்தேசியப் பேரியக்கம்.
தமிழ்நாட்டு உரிமைகளை மட்டுமல்ல, தமிழர் உயிர்களையும் தில்லி பறித்து வருகிறது. அந்தத் தொடர்ச்சியில் அரியலூர் அனிதா உயிரையும் பறித்துள்ளது!

உச்ச நீதிமன்றத்தில் நடந்த “நீட்” வழக்கில், எடப்பாடி அரசை நம்பி அனிதா தமிழ்நாட்டுத் தரப்பில் சேர்ந்து வழக்கு நடத்தினார். நடுவண் அமைச்சர் நிர்மலா சீத்தாராமன் நடப்பாண்டு மாணவர் சேர்க்கையில், “நீட்” தேர்வுக்கு தமிழ்நாட்டுக்கு விலக்கு அளிக்கப்படும் என நம்பிக்கை ஊட்டினார்.

நம்ப வைத்துக் கழுத்தறுத்ததைப் போல் துரோகம் செய்த நடுவண் அரசும், தமிழ்நாடு அரசுமே தற்கொலை செய்து கொள்ள அனிதாவை தூண்டியவை!

“நீட்” என்பது மாணவரின் தகுதியைச் சோதிக்கும் தேர்வல்ல - மாநில உரிமையைப் பறிக்கும் தேர்வு! இதன் அடுத்த கட்டமாக “நீட்” தேர்வில் பெற்ற மதிப்பெண் அடிப்படையில், வடஇந்திய மற்றும் வெளி மாநில மாணவர்களைத் தமிழ்நாடு அரசின் மருத்துவக் கல்லூரிகளில் சேர்ப்பார்கள். தமிழ்நாட்டு மாணவர்கள் சேர்க்கை எண்ணிக்கை குறையும். சேர்க்கும் தமிழ்நாட்டு மாணவர்களையும் தொலைதூர மாநிலங்களுக்குத் தூக்கி வீசுவார்கள்!

இப்பொழுதுதான் “நீட்” என்பது தமிழர் தாயக உரிமையையும் - இன உரிமையையும் பறிக்கும் தேர்வு முறை என்று உணர்ந்து கொண்டுள்ளோம். ஆனால் “நீட்” போன்ற தேர்வுகள் ஏற்கெனவே இந்திய அரசு நிறுவனங்களில், வேலையில் சேர்வதற்கு நடத்தப்பட்டு வருகின்றன.

பி.எச்.இ.எல். போன்ற தொழில் நிறுவனங்கள், இரயில்வே, அஞ்சலகம், நடுவண் அரசின் வரி வசூல் அலுவலகங்கள், ஆவடி – திருச்சி படைத்துறைத் தொழிற்சாலைகள் மற்றும் வங்கிகள் ஆகியவற்றிற்கு ஏற்கெனவே அனைத்திந்தியத் தேர்வு வைத்து, தமிழ்நாட்டில் உள்ள அந்நிறுவனங்களில் தமிழ் மாணவர்கள் வெற்றி பெறாமல் தடுத்து வருகிறார்கள். இப்பொழுதெல்லாம் மேற்படி நடுவணரசு நிறுவனங்களில் 100க்கு 80 விழுக்காட்டு அளவில் வெளி மாநிலத்தைச் சேர்ந்தவர்களையே வேலைக்குச் சேர்க்கிறார்கள்.

அடுத்து, தமிழ்நாட்டின் மாவட்ட அளவிலான நீதிபதிகள் மற்றும் அரசு மருத்துவமனைகளுக்கான மருத்துவர்கள் ஆகியோரை பணியமர்த்துவதற்கு அனைத்திந்தியத் தேர்வு முறையை அறிவித்துள்ளார்கள். அதன்படி தமிழ்நாட்டில், நீதிமன்றங்களிலும் அரசு மருத்துவமனைகளிலும் தமிழ் தெரியாத – வடமாநிலங்கள் உள்ளிட்ட வெளி மாநிலங்களைச் சேர்ந்தவர்கள் நீதிபதிகளாகவும் மருத்துவர்களாகவும் இருப்பார்கள்.

எனவேதான், இந்த அனைத்திந்தியத் தேர்வுகள் அனைத்தும் தமிழர் தாயகத்தில் தமிழர்கள் படிக்கும் உரிமையைப் பறிப்பது, வேலை பார்க்கும் உரிமையைப் பறிப்பது என்ற உள்ளடக்கம் கொண்டவை! ஆரியத்துவாத் தத்துவத்தின்படி தமிழர்களை ஓரங்கட்டி, கீழ்நிலைக்குத் தள்ளும் இந்திய அரசின் ஏற்பாடுகள்தான் இந்தத் தேர்வுகள்!

எனவே, மொழிவழியாக அமைந்துள்ள தமிழ்த்தேசிய இன தாயக உரிமைகளைப் பாதுகாக்கத்திட வலுவாகப் போராட வேண்டும்!

நம் கோரிக்கைகள்
=================
1. முதல்வர் பொறுப்பிலிருந்து எடப்பாடி பழனிச்சாமி விலக வேண்டும், நடுவண் அமைச்சர் பொறுப்பிலிருந்து நிர்மலா சீத்தாராமன் விலக வேண்டும்.
2. தமிழ்நாட்டுக்கு “நீட்” தேர்விலிருந்து நிரந்தரமாக விலக்களிக்க வேண்டும்.
3. கல்வியை மீண்டும் மாநில அதிகாரப் பட்டியலுக்குக் கொண்டு வர வேண்டும்.
தனக்காக மட்டுமின்றி, தமிழ்நாட்டின் உரிமைக்காகவும் - தன்னுயிர் ஈந்த மாணவி அனிதாவுக்கு வீரவணக்கம்!

தஞ்சை ஆர்ப்பாட்டத்தை வாருங்கள் தமிழர்களே!
 
தொடர்புக்கு: நா. வைகறை - 94436 17757
 
தலைமைச் செயலகம்,
தமிழ்த்தேசியப் பேரியக்கம்
 
 
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: www.tamizhthesiyam.com 

 
 



Monday, September 4, 2017

ஆரியத்தால் கொல்லப்பட்ட அனிதா! பெண்ணாடம்- ஆர்ப்பாட்டம்!!!!!!

ஆரியத்தால் கொல்லப்பட்ட அனிதா! பெண்ணாடம் - ஆர்ப்பாட்டம்!!!!!!

 
அரியலூர் மாவட்டம் குழும்பூர் மாணவி அனிதா படுகொலைக்கு காரணமான மத்திய, மாநில அரசுகளை கண்டித்து தமிழ்நாட்டில் நீட் தேர்வை இரத்து செய்ய வலியுறுத்தி பெண்ணாடம் பழைய பேருந்து நிலையம் அருகில் தமிழ்த்தேசியப் பேரியக்க பொதுக்குழு உறுப்பினர் தோழர் அர. கனகசபை தலைமையில் இன்று (4-9-2017) மாலை நடைபெற்றது.
 
 
 
 
 
மாணவி அனிதாவுக்கு வீரவணக்கம்!
அனிதாவைக் காவ வாங்கிய ஆரியத்தை பழிதீர்ப்போம்! 
ஆரிய இந்தியாவின் இனப்பகையை முறியடிப்போம்!

தலைமைச் செயலகம், 
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com 
இணையம்: tamizhdesiyam.com

Sunday, September 3, 2017

ஆரியத்தால் கொல்லப்பட்ட அனிதா!

ஆரியத்தால் கொல்லப்பட்ட அனிதா!

இந்திய மருத்துவக் கழகம் தொடங்கப்படுவதற்கு - இருபதாண்டுகளுக்கு முன்பேயே தமிழ்நாட்டில் மருத்துவக் கழகம் தொடங்கப்பட்டது. இந்தியாவின் மருத்துவத் தலைநகராக விளங்கும் அளவிற்கு, மருத்துவத்தில் தமிழ்நாடே சிறந்து விளங்கியது.

இவற்றையெல்லாம் முறியடித்து, தமிழர்களை தற்குறிகளாக மாற்ற வேண்டுமென்ற ஆரிய இனவெறி வன்மத்தோடுதான் - தமிழ்நாட்டின் மீது மிக வன்மையாக “நீட்” தேர்வு வலிந்து திணிக்கப்பட்டது. 2017 சனவரி மாத இறுதியில் நிறைவேற்றப்பட்ட தமிழ்நாட்டின் “நீட்” சட்டத்திற்கு, இந்திய அரசு ஒப்புதல் அளிக்காததற்கான காரணம் - ஆரிய இனவெறிப் பகையே அன்றி வேறல்ல!

இந்த இனப்பகையின் களபலியாகத்தான் அரியலூர் மாணவி தங்கை அனிதா, “பாரத மாதா” பலி பீடத்தில் காவு கொடுக்கப்பட்டார். இந்த உண்மையை, இனியாவது உரக்கப் பேசுவோம்!



நேற்று (02.09.2017) மாலை, அரியலூர் குழுமூர் கிராமத்தில் நடைபெற்ற அனிதாவின் இறுதி வணக்க நிகழ்வில், பல்வேறு கட்சி - இயக்கங்களைச் சேர்ந்த ஆயிரக்கணக்கானோரும், பொது மக்களும் உணர்ச்சிப் பெருக்கோடு பங்கேற்றனர். தமிழ்த் தேசியப் பேரியக்கத் தலைமைச் செயற்குழு உறுப்பினர் தோழர் க. முருகன் தலைமையில் பேரியக்கத் தோழர்கள் பங்கேற்றனர்.


மாணவி அனிதாவுக்கு வீரவணக்கம்!
அனிதாவைக் காவ வாங்கிய ஆரியத்தை பழிதீர்ப்போம்!
ஆரிய இந்தியாவின் இனப்பகையை முறியடிப்போம்!

தலைமைச் செயலகம், 
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com 
இணையம்: tamizhdesiyam.com 

Friday, September 1, 2017

மாணவி அனிதா தற்கொலை: எடப்பாடியும் நிர்மலா சீத்தாராமனும் பதவி விலக வேண்டும்! தோழர் பெ. மணியரசன் அறிக்கை!

மாணவி அனிதா தற்கொலை: எடப்பாடியும் நிர்மலா சீத்தாராமனும் பதவி விலக வேண்டும்! தமிழ்த்தேசியப் பேரியக்கத் தலைவர் தோழர் பெ. மணியரசன் அறிக்கை! 
ஏகாதிபத்திய மனப்போக்குடன் இந்திய அரசு திணித்த மருத்துவக் கல்லூரி மாணவர் சேர்க்கைக்கான “நீட்” தேர்வு, தமிழ்நாட்டு பட்டியல் வகுப்பைச் சேர்ந்த மாணவி அனிதாவின் உயிரைப் பலிவாங்கிவிட்டது!

அன்றாடம் மூட்டைத் தூக்கி உழைத்துக் குடும்பம் நடத்தும் அரியலூர் மாவட்டம் - குழுமூர் சண்முகத்தின் மகளான அனிதா, “மருத்துவராக வேண்டும்” என்ற நேர்மையான கனவுடன் கடுமையாக உழைத்து, +2 தேர்வில் 1176 மதிப்பெண் வாங்கினார். மருத்துவக் கல்லூரியில் சேர்வதற்கான அவரது கட்ஆப் மதிப்பெண் 196.75 ஆகும்.

தமிழ்நாட்டில் வழக்கமாக +2 மதிப்பெண் அடிப்படையில் மருத்துவக் கல்வியில் மாணவர் சேர்க்கை இவ்வாண்டு நடந்திருந்தால், எடுத்த எடுப்பிலேயே மாணவி அனிதா மருத்துவக் கல்லூரியில் சேர்க்கப்பட்டிருப்பார்.

“நீட்” தேர்வில், அனிதா படித்த பாடத்திட்டத்திற்கு வெளியே நடுவண் கல்வி வாரிய (சி.பி.எஸ்.இ.) பாடத்திட்ட கேள்விகள் கேட்கப்பட்டதால், மிகக்குறைவான மதிப்பெண்ணே அனிதாவால் வாங்க முடிந்தது.

தன் குடும்பத்தின் வறுமை நிலையை - அன்றாடம் கண்டு மனம் நொந்து தான் மருத்துவராகி அந்த நிலையை மாற்ற வேண்டும் என்ற உறுதியில் - ஊக்கமுடன் படித்து முதல் தரமான மதிப்பெண் வாங்கினார், அந்த ஒடுக்கப்பட்ட வகுப்பு மாணவி!

இவ்வாண்டுக்கு “நீட்” தேர்விலிருந்து விலக்கு அளிக்கும் தமிழ்நாடு அரசின் ஆணையை எதிர்த்து, உச்ச நீதிமன்றத்தில் போடப்பட்ட வழக்கில், தமிழ்நாடு அரசுத் தரப்பில் தன்னையும் இணைத்துக் கொண்டு அவ்வழக்கை வலுப்படுத்தினார். இந்த முயற்சிகளெல்லாம் பலன் அளிக்காத நிலையில், தனது குடும்பத்தின் எதிர்காலம் பற்றிய கனவு நொறுங்கியதும், மாணவி அனிதா தற்கொலை செய்து கொண்டுள்ளார்.

தமிழ்நாட்டில் அனைத்துத் தமிழ் நெஞ்சங்களிலும் ஈட்டி பாய்ச்சியதைப் போல், அனிதாவின் தற்கொலை சொல்லொண்ணா துன்பம் தருகிறது!

இளம் மாணவி அனிதாவின் உயிரைக் காவு கொண்டவர்கள் இந்திய ஏகாதிபத்திய ஆட்சியாளர்களும், தமிழ்நாட்டுக் கங்காணி ஆட்சியாளர்களும் ஆவர்.

இந்திய அரசமைப்புச் சட்டத்தில் உள்ள பொது அதிகாரப் பட்டியலில் “கல்வி” சேர்க்கப்பட்டுள்ளது. இந்தப் பொது அதிகாரப் பட்டியல் என்பது, மாநில அரசுக்கும் – நடுவண் அரசுக்கும் பொதுவான அதிகாரப் பட்டியலாகும். இதில் மாநில அரசும் சட்டம் இயற்றலாம், நடுவண் அரசும் சட்டம் இயற்றலாம்.

நீட் தேர்வு தமிழ்நாட்டில் தேவையில்லை என்றும், தமிழ்நாட்டில் ஏற்கெனவே கடைபிடித்து வரும் மதிப்பெண் அடிப்படையிலான மாணவர் சேர்க்கையைத் தொடர வேண்டும் என்றும் தமிழ்நாடு சட்டப்பேரவை 2017 பிப்ரவரி மாதம், ஒரு மனதாக சட்ட முன்வடிவு நிறைவேற்றி குடியரசுத் தலைவர் ஒப்புதலுக்காக தில்லிக்கு அனுப்பி வைத்தது. இதுவரை அந்த சட்ட முன் வடிவுக்கு ஒப்புதல் தராமலும், நேரடியாக மறுப்புத் தெரிவிக்காமலும் கிடப்பில் போட்டு விட்டது இந்திய அரசு!

இதுபோல் இந்தியாவின் பல மாநிலங்களிலிருந்து, “பொதுப்பட்டியல்” தொடர்பாக, பல்வேறு துறைகள் சார்பாக நிறைவேற்றப்பட்ட 95 சட்ட முன் வடிவுகளுக்கு இந்திய அரசு ஒப்புதல் தராமல் கிடப்பில் போட்டுள்ளது என்று செய்தி வெளியாகியுள்ளது. இவற்றில் தமிழ்நாடு அரசு அனுப்பி வைத்த 5 சட்ட முன் வடிவுகளும் அடங்கும்!

நடைமுறையில் “பொதுப்பட்டியல்” என்ற ஒன்று இல்லை என்ற நிலையை நரேந்திர மோடி அரசும், ஏற்கெனவே காங்கிரசு அரசும் ஏற்படுத்திவிட்டன.

“நீட்” தேர்வு குறித்து நாடாளுமன்றக் குழு வழங்கிய 92ஆவது பரிந்துரையில், “நீட்” தேர்வை விரும்பாத மாநிலங்களுக்கு விலக்கு அளிக்கலாம் என்று கூறியுள்ளது. நாடாளுமன்றக் குழுவின் இந்தப் பரிந்துரைப்படி, தமிழ்நாட்டின் சட்ட முன்வடிவுக்கு மோடி அரசு ஒப்புதல் வழங்காதது ஏன்?

தமிழ்நாடு அரசு இது தொடர்பாக சட்ட முன்வடிவை இயற்றி அனுப்பிவிட்டு, ஓர் அரசாணை இயற்றும் நிலைக்கு மாறியது ஏன்? இந்தக் கேள்வியை இவ்வழக்கில் சென்னை உயர் நீதிமன்றத்தில் தனி நீதிபதி ஏற்கெனவே கேட்டுள்ளார். அவ்வப்போது நரேந்திர மோடியுடன் கூடிக் குலாவிக் கொண்டிருக்கும் எடப்பாடி பழனிச்சாமியும் அவர்களது அமைச்சர்களும், “நீட்” தேர்வுக்கு விலக்கு அளிக்கும் சட்ட முன்வடிவை சட்டமாக்கித்தர வலியுறுத்தவே இல்லையா?

நடுவண் அமைச்சர் நிர்மலா சீத்தாராமன், தமிழ்நாட்டிற்கு இந்த ஓராண்டு நீட் தேர்விலிருந்து விலக்கு அளிக்க நடுவண் அரசு ஒப்புக் கொண்டுள்ளது என்று உறுதியளித்தார். ஆனால், உச்ச நீதிமன்றத்தில் தமிழ்நாடு அரசு இயற்றிய அரசாணை குறித்த வழக்கு வந்தபோது, இந்திய அரசின் தலைமை வழக்கறிஞர் தமிழ்நாடு அரசின் சட்ட முடிவை நாங்கள் ஏற்கவில்லை என்று மனுத்தாக்கல் செய்தார்.

நரேந்திர மோடி அரசு, ஆதரவளிப்பது போல் நாடகமாடி கடைசியில் கழுத்தறுத்துவிட்டது! இதில் நிர்மலா சீத்தாராமன் பாத்திரம் எப்படிப்பட்டது என்று கண்டறிய வேண்டியுள்ளது.

வாக்குறுதி கொடுத்துவிட்டு - காலை வாரி விட்ட இந்திய அரசின் இந்த ஏமாற்று வேலையை விமர்சித்து, தமிழ்நாடு முதலமைச்சர் எடப்பாடி பழனிச்சாமி ஒரு வார்த்தை கூட பேசாதது ஏன்?

ஊர் ஊராக விழாக் கொண்டாடிக் கொண்டு, வாண வேடிக்கை நடத்தி வாய்ச்சவடால் அடித்துக் கொண்டு வருகிறார். “நீட்” தேர்வில் தமிழ்நாட்டை பலியிட்டதைப் போலவே, மாநில அரசின் வணிக வரி உரிமையைப் பறித்துக் கொண்ட ஜி.எஸ்.டி. வரியையும் எடப்பாடி பழனிச்சாமி ஏற்றுக் கொண்டார். அடுத்து, காவிரியில் தமிழ்நாட்டுக்கு பாதகம் செய்யும் வகையில் நடுவண் அரசு முன்வைக்கும் கட்டப்பஞ்சாயத்து குறித்தும் அனுசரனையாக இருக்கிறார். எடப்பாடி பழனிச்சாமி அரசு, இன்னும் என்னென்ன தமிழ்நாட்டு உரிமைகளைப் பலியிடுமோ என்ற அச்சம் மக்களுக்கு ஏற்பட்டுள்ளது.

மாணவி அனிதாவின் சாவிற்கு முதன்மைப் பொறுப்பாளி இந்திய அரசு - இரண்டாவது பொறுப்பாளி தமிழ்நாடு அரசு! வாக்குறுதி கொடுத்து மோசடி செய்த நடுவண் அமைச்சர் நிர்மலா சீத்தாராமனும், அந்த மோசடி நாடகத்தை அனுமதித்து தமிழ்நாட்டு உரிமையை பலியிட்ட எடப்பாடி பழனிச்சாமியும் உடனடியாகப் பதவி விலக வேண்டும்!

இன்றைக்குள்ள இந்திய அரசு மற்றும் தமிழ்நாடு அரசின் போக்குகள், இதே நிலையில் நீடித்தால் தமிழ்நாட்டு மக்கள் குடியிருக்கும் உரிமையைக் கூட இழக்க வேண்டிய அவலம் ஏற்படலாம்! எனவே, எடப்பாடி பழனிச்சாமியும் நிர்மலா சீத்தாராமனும் பதவி விலகி தமிழ்நாட்டு மக்களுக்கு புதிய நம்பிக்கை அளிப்பதற்கான சூழலை உருவாக்க வேண்டும். தமிழ்நாடு அரசும் இந்திய அரசும் தங்களின் பழியைத் துடைத்துக் கொள்ளும் வகையில், போர்க்கால அவசரத்துடன் தமிழ்நாட்டிற்கு “நீட்” தேர்விலிருந்து நிரந்தர விலக்களிக்கக்கூடிய சட்டத்தை இயற்ற வேண்டும்.

மாணவி அனிதாவின் இழப்பு அவருடைய பெற்றோருக்கு மட்டுமல்ல, அனைவருக்குமான பெரும் துயரம்! அனிதாவின் நினைவைப் போற்றும் அதே வேளையில், மாணவ மாணவிகள் மனம் உடைந்து விடாமல் இந்த நிலையை மாற்றிட - “நீட்” தேர்வை விரட்டியடிக்கும் முயற்சியில் இறங்க வேண்டும் என்றும், மாணவர்கள் மட்டுமின்றி, ஒட்டு மொத்தத் தமிழ் மக்களும் “நீட்” தேர்வை விரட்டியடிக்கும் அறப்போராட்டத்தில் இறங்க வேண்டிய தேவை எழுந்துள்ளது என்றும் தமிழ்த்தேசியப் பேரியக்கம் சார்பில் தெரிவித்துக் கொள்கிறேன்.

தலைமைச் செயலகம், 
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhdesiyam.com 

சுருங்கி வரும் ஜனநாயகம் குறித்தான பொது உரையாடல்!

சுருங்கி வரும் ஜனநாயகம் குறித்தான பொது உரையாடல்!


“மனித உரிமைப் போராளி” - வழக்குரைஞர் பி.வி. பக்தவச்சலம் அவர்களின் பத்தாம் ஆண்டு நினைவு நிகழ்வாக, நாளை (02.09.2017) “சுருங்கி வரும் ஜனநாயகம் குறித்தான பொது உரையாடல்” என்ற தலைப்பில் கருத்தரங்கம் நடைபெறுகின்றது.

பி.வி.பி. அறக்கட்டளை மற்றும் மக்கள் கண்காணிப்பகம் ஆகிய அமைப்புகளின் சார்பில், நாளை (02.09.2017) காலை 10 மணிக்கு, சென்னை நுங்கம்பாக்கம் இலயோலா கல்லூரியின் இலாரன்சு சுந்தரம் அரங்கில் நடைபெறும் இக்கருத்தரங்குக்கு, மக்கள் கண்காணிப்பகம் செயல் இயக்குநர் - வழக்கறிஞர் ஹென்றி திபேன் தலைமை தாங்குகிறார்.

எழுத்தாளர் பா. செயப்பிரகாசம், மருத்துவர் பி.வி. வெங்கட்ராமன் (பி.சி.ப. அறக்கட்டளை) ஆகியோர் முன்னிலை வகிக்கின்றனர். வழக்கறிஞர் அஜிதா அறிமுக உரையாற்ற, ஓய்வு பெற்ற சென்னை உயர் நீதிமன்ற நீதிபதி து. அரிபரந்தாமன் தொடக்க உரையாற்றுகிறார்.

நிகழ்வில், பல்வேறு கட்சி - இயக்கங்களைச் சேர்ந்த தலைவர்கள் கருத்துரையாற்றுகின்றனர். தமிழ்த்தேசியப் பேரியக்கம் சார்பில், பொதுச் செயலாளர் தோழர் கி. வெங்கட்ராமன் உரையாற்றுகிறார்.

நிகழ்வில், தமிழின உணர்வாளர்களும், சனநாயக ஆற்றல்களும் திரளாகப் பங்கேற்க வேண்டுமென அன்புரிமையுடன் அழைக்கின்றோம்!


தலைமைச் செயலகம், 
தமிழ்த்தேசியப் பேரியக்கம்
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhdesiyam.com

Thursday, August 31, 2017

ஆளுநருக்கு அரசமைப்புச் சட்டம் வழி காட்டுகிறதா? ஆர்.எஸ்.எஸ். வழி காட்டுகிறதா? தோழர் பெ. மணியரசன் கேள்வி!

ஆளுநருக்கு அரசமைப்புச் சட்டம் வழி காட்டுகிறதா? ஆர்.எஸ்.எஸ். வழி காட்டுகிறதா? தமிழ்த்தேசியப் பேரியக்கத் தலைவர் தோழர் பெ. மணியரசன் கேள்வி! 
தமிழ்நாடு பொறுப்பு ஆளுநர் வித்தியாசாகர ராவ் “தினகரன் குழுவினர் உட்பட அனைத்து அ.இ.அ.தி.மு.க. சட்டப்பேரவை உறுப்பினர்களும், அ.இ.அ.தி.மு.க.வை விட்டு விலகவில்லை, அதிலேயே இருக்கிறார்கள்; எனவே முதல்வர் எடப்பாடி பழனிச்சாமி சட்டப்பேரவையில் நம்பிக்கை வாக்கு கோர வேண்டிய தேவை இல்லை” என்று கூறி இருப்பது, ஆளுநர் நடுநிலையோடு செயல்படவில்லை என்பதைக் காட்டுகிறது.
அ.இ.அ.தி.மு.க.வின் தன்னலக் குழுக்கள் நடத்திக் கொண்டிருக்கும் பதவிச் சண்டையைப் பயன்படுத்தி, பா.ச.க.வின் தில்லித் தலைமை தமிழ்நாட்டில் தனது நாட்டாண்மை அரசியலை வலுப்படுத்திக் கொள்ளும் வேலைகளைத் தொடர்கிறது. இந்திய அரசமைப்புச் சட்டத்தையும் அரசியல் அறத்தையும் பலியிட்டு, தமிழ்நாட்டில் பா.ச.க.வை ஊதிப் பெருக்கச் செய்ய நடுவண் அரசு முயல்கிறது.
தினகரன் குழுவினர் ஆளுநர் வித்தியாசாகர ராவைக் கடந்த 22.08.2017 அன்று சந்தித்து, தங்கள் அணியைச் சேர்ந்த சட்டப்பேரவை உறுப்பினர்கள் 19 பேரும் முதல்வர் எடப்பாடி பழனிச்சாமிக்கு அளித்து வந்த ஆதரவை விலக்கிக் கொண்டு விட்டார்கள் என்று கூறும் மனுவைத் தனித்தனியே அளித்தனர். அதில் முதல்வர் எடப்பாடி பழனிச்சாமியை மாற்ற வேண்டும் என்றும் ஆளுநரைக் கேட்டுக் கொண்டிருந்தனர்.
அதையொட்டி தி.மு.க. உள்ளிட்ட எதிர்க்கட்சியினர் நம்பிக்கை வாக்கெடுப்பு நடத்த ஆளுநர் ஆணையிட வேண்டும் என்று கோருகின்றனர். இக்கோரிக்கை மனுவை நேற்று (30.08.2017) எதிர்க்கட்சிகள் அளித்த போது மேற்கண்டவாறு ஆளுநர் கூறியுள்ளார்.
அ.இ.அ.தி.மு.க.வின் தன்னலக் குழுக்களின் பதவிச் சண்டையினால் கடந்த எட்டு மாதங்களாகத் தமிழ்நாட்டில் மாநில அரசின் செயல்பாடுகள் குழம்பிக் கிடக்கின்றன; பல துறைகளில் வேலைகள் தேங்கிக் கிடக்கின்றன. இன்னொரு பக்கம் சட்டப்பேரவை உறுப்பினர்களை அவ்வப்போது அதிக விலையில் குத்தகைக்கு எடுத்து கூடாரங்களில் அடைத்து வைத்துக் கொள்ளும் அ.தி.மு.க. தன்னலக் குழுக்களின் “சந்தைச் சனநாயகம்” அரங்கேறிக் கொண்டிருக்கிறது. அ.இ.அ.தி.மு.க. அணிகளின் இந்தச் செயல்கள் தமிழ்நாட்டிற்குத் தலைகுனிவை ஏற்படுத்துகின்றன.
தமிழ்நாட்டிற்கு ஏற்பட்டுள்ள இந்தத் தலைகுனிவையும், ஆட்சி மற்றும் அரசியல் குழப்பங்களையும் பா.ச.க.வின் நடுவண் அரசு கொண்டாடுகிறது. கொல்லைப்புற வழியில் தமிழ்நாட்டு ஆட்சியைப் பிடிக்க சூழ்ச்சி செய்கிறது.
தமிழ்நாட்டு ஆட்சிக்கு இன்று ஏற்பட்டுள்ள சிக்கல்களுக்குத் தீர்வு காண அரசமைப்புச் சட்டத்திலும், ஏற்கெனவே எஸ்.ஆர். பொம்மை உள்ளிட்ட பல வழக்குகளில் உச்ச நீதிமன்றம் வழங்கியுள்ள தீர்ப்புகளிலும் வழி சொல்லப்பட்டிருக்கிறது. சட்டமன்றத்தில் பெரும்பான்மையை ஐயத்திற்கு இடமின்றி அறிய வேண்டுமே தவிர ஆளுநரின் விருப்பு வெறுப்புக்கேற்ப முடிவு செய்ய முடியாது. இவ்வாறான சட்டவழியைப் பின்பற்றாமல், கொல்லைப்புற வழிகளைப் பின்பற்றுவது, பா.ச.க. ஆட்சியாளர்களே அரசமைப்புச் சட்டத்தை முறிக்கும் செயலாகும்.
முதல்வர் எடப்பாடி பழனிச்சாமிக்குத் தந்துவந்த ஆதரவை விலக்கிக் கொண்டதாக ஆளுநரிடம் மனுக் கொடுத்த தினகரன் அணியைச் சேர்ந்த 19 சட்டப்பேரவை உறுப்பினர்களைக் கட்சித் தாவல் தடைச் சட்டத்தின் கீழ் பதவி நீக்கம் செய்வதற்கு பேரவைத் தலைவர் தனபால் மூலம் காரணம் கேட்கும் கடிதம் கொடுத்திருக்கும் எடப்பாடி அணியின் செயல், கட்சித்தாவல் தடைச் சட்டத்திற்குப் பொருந்தாது என்பது மட்டுமல்ல, அருவருக்கத்தக்க தன்னல வெறியாட்டம் ஆகும்!
அதேபோல் சட்டப் பேரவையில் தடை செய்யப்படட குட்காவைக் காட்டி, இந்த சட்ட விரோத வணிகத்திற்கு அமைச்சர்களே காரணம் என்று பேசிய எதிர்க்கட்சித் தலைவர் மு.க. ஸ்டாலின் மற்றும் தி.மு.க. உறுப்பினர்கள் மீது நடவடிக்கை எடுத்து இடைநீக்கம் செய்ய எடப்பாடி அரசு முயல்வது, செயலலிதா ஆட்சியில் சசிகலா அதிகாரத்தைத் தன்னல நோக்கங்களுக்குத் தவறாகப் பயன்படுத்தி ஆடிய ஆட்டத்தை ஒத்தது ஆகும்!
இந்நிலையில் ஆளுநருக்கு அரசமைப்புச் சட்டம் வழிகாட்டுகிறதா அல்லது ஆர்.எஸ்.எஸ். வழிகாட்டுகிறதா என்ற வினா எழுந்துள்ளது.
எனவே தமிழ்நாடு ஆளுநர், உடனடியாக சட்டப்பேரவையில் நம்பிக்கை வாக்கு கோர வேண்டும் என்று முதல்வர் எடப்பாடி பழனிச்சாமிக்கு காலக்கெடு விதித்து ஆணை இட வேண்டும் என்று தமிழ்த்தேசியப் பேரியக்கத்தின் சார்பில் கேட்டுக் கொள்கிறேன்.
தலைமைச் செயலகம், 
தமிழ்த்தேசியப் பேரியக்கம்
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com 
இணையம்: www.tamizhdesiyam.com 

Tuesday, August 15, 2017

"தமிழர் மீட்சி - இன முழக்கம்" தமிழ்நாடடெங்கும் பரப்புரை இயக்கம்!

"தமிழர் மீட்சி - இன முழக்கம்" தமிழ்நாடடெங்கும் பரப்புரை இயக்கம்!



 

பேரன்புடையீர், உங்களைத் தேடி வந்திருக்கிறோம்! “ஆதாயமில்லாமல் வருவீர்களா” என்று நீங்கள் நினைக்கலாம்! அரசியல் வாதிகள் உங்களுக்குத் தந்த அனுபவம் அவ்வாறு உள்ளது!
 
நாங்கள் எந்தப் பதவிக்கும் தேர்தலில் போட்டியிடு வதில்லை. எந்தத் தேர்தல் கூட்டணியிலும் சேர்வ தில்லை. வேறு வகையான எந்தப் பதவிக்கும் முயல்வ தில்லை. தன்னலப் பயன் கருதா தமிழர் பணி மற்றும் தமிழ்ப்பணி என்று செயல்படுகிறோம்!
 
தமிழ்நாட்டு அரசியல் கட்சிகள் தங்களுக்குள் போட்டுக் கொள்ளும் தன்னலப் பதவிச்சண்டையே தமிழ்நாட்டு அரசியல் என்று ஆகிவிட்டது. ஆனால், இந்திய அரசோ இந்தச் சண்டையைப் பயன்படுத்தி, தமிழ்நாட்டு உரிமைகளையும், தமிழர்களின் வாழ்வுரி மைகளையும் ஒவ்வொன்றாகப் பறித்துக் கொண்டுள்ளது. தமிழ்நாட்டு அரசியல் கட்சிகளுக்கு அவ்வுரிமைகளைக் காப்பாற்றும் அக்கறையும் இல்லை; ஆற்றலும் இல்லை!
 
இந்தியாவை ஆளும் பாரதிய சனதாக் கட்சியோ, ஏழை மற்றும் நடுத்தர மக்களின் வயிற்றில் அடித்து பெருங்குழும (கார்ப்பரேட்) முதலாளிகளைக் கொழுக்க வைக்கிறது. இட்லி, தோசைக்கு சரக்கு சேவை வரி (ஜி.எஸ்.டி.) போட்டு வசூலிக்கிறது! போர்டு, ஹூண்டாய், பாரத் பென்சு, மகேந்திரா, அசோக் லேலண்ட் போன்ற பெரும் பெரும் கார்ப்பரேட் முதலாளிகள் உற்பத்தி செய்யும் ஊர்திகளுக்கு இதுவரை வசூலிக்கப் பட்ட உற்பத்தி வரியை (எக்சைஸ்) நீக்கிவிட்டது. அவற்றிற்கான வரியை அவற்றை வாங்குபவர்கள் கட்டிக் கொள்ளட்டும் என்று கூறிவிட்டது!
 
ஏழை, நடுத்தர மக்கள் மானிய விலையில் பயன்படுத்தி வரும் சமையல் எரிவளி (கேஸ்) உருளைக்கு அளித்து வந்த மானியத்தை பா.ச.க. ஆட்சி முற்றாக நீக்கிவிட்டது. அதன்விலை கிடுகிடுவென்று உயரப் போகிறது! அத்துடன் ஞாயவிலைக் கடைகளை இழுத்து மூடும் திட்டத்தையும் இப்போது அறிவித்துள்ளது!
 
தமிழ்நாடு அரசு பாடத்திட்டத்தின்படி படித்த தமிழ்நாட்டு மாணவர்கள், தமிழ்நாடு அரசு நடத்தும் மருத்துவக் கல்லூரிகளில் சேர முடியாதபடி, தில்லிப் பாடத்திட்டத்தில் (சி.பி.எஸ்.இ.) படித்த மாணவர்களுக்கு இடம்கொடுக்கும் வகையில் பா.ச.க. ஆட்சி “நீட்” தேர்வைப் புகுத்தியுள்ளது. தமிழ்நாட்டு ஆட்சியாளர்கள் தமிழைப் புறக்கணித்து, ஆங்கில ஆதிக்கத்தை வளர்த்து வருகிறார்கள். இந்திய அரசோ இந்தியையும் சமற்கிருதத்தையும் தீவிரமாகத் திணிக்கிறது.
 
காவிரி, முல்லைப் பெரியாறு, பாலாறு, தென்பெண்ணை போன்ற தமிழ்நாட்டு ஆறுகளின் உரிமைகளை அண்டை மாநிலங்கள் பறித்துக் கொள்ள இந்திய அரசு துணை செய்கிறது. கச்சத்தீவை இந்திய அரசு இலங்கைக்குக் கொடுத்ததால், ஏராளமான தமிழக மீனவர்களை சிங்களப்படை சுட்டுக் கொன்றது. இப்போதும் தமிழ் மீனவர்களையும், அவர்களின் படகுகளையும் சிங்களப்படை இலங்கைக்கு அன்றாடம் கடத்திக் கொண்டு போகிறது.
 
நெல், வாழை, கரும்பு, தென்னை, மஞ்சள் போன்றவை விளையும் வளமான நிலங்களில் பெட்ரோலியம், எரிவளி, மீத்தேன் உள்ளிட்ட ஐட்ரோ கார்பன் மற்றும் நிலக்கரி ஆகியவற்றை எடுக்க ஓ.என்.ஜி.சி.யையும், பெரும் கார்ப்பரேட் நிறுவனங்களையும் களத்தில் இறக்கி விட்டுள்ளது இந்திய அரசு! தமிழ்நாடு அரசோ, தமிழ்நாட்டு மக்களின் உரிமைகளைக் காக்க முன்வராமல், வாழ்விற்காகப் போராடும் மக்கள் மீது காவல்துறை முற்றுகையையும், அடக்குமுறையையும் ஏவி விடுகிறது. அறப்போராட்டம் நடத்துவோரை சிறையிலடைக்கிறது!
 
பெண்களும், ஆண்களும் தங்கள் வாழ்க்கையைப் பாதுகாத்துக் கொள்ள டாஸ்மாக் மதுக்கடைகளை நிரந்தரமாக மூடப் போராடுகிறார்கள். தமிழ்நாடு அரசோ அவர்கள் மீது காவல்துறையை ஏவித் தாக்குகிறது! புதிது புதிதாக டாஸ்மாக் கடைகளைத் திறக்கிறது! தமிழ்நாட்டின் பெரிய அரசியல் கட்சிகள் மேற்கண்ட போராட்டங்களைத் தாங்கள் முன்னெடுக்காமல், அப்போராட்டங்களை ஆதரிப்பதாக கூறிக்கொள்கின்றன.
 
இந்நிலையில்தான், தமிழ்நாட்டுத் தாயக உரிமைகளையும் தமிழர்களின் வாழ்வுரிமைகளையும் பாதுகாத்திட தமிழ்த்தேசியம் என்ற தத்துவச் சுடர் ஏந்தி, தமிழ்த்தேசியப் பேரியக்கம் மக்கள் போராட்டங்களுடன் தன்னை இணைத்துக் கொள்கிறது! அப்போராட்டங்களிடையே ஒருங்கிணைப்பை உருவாக்கவும், ஒட்டு மொத்தத் தமிழ்நாட்டின் எழுச்சியாக அவற்றைக் கொண்டு செல்லவும் திசைகாட்டுகிறது.
 
இது குறித்து உங்களுடன் உரையாட விரும்புகிறோம்!
 
தலைமைச் செயலகம்,
தமிழ்த்தேசியப் பேரியக்கம்
 
பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: www.tamizhthesiyam.com

Friday, August 11, 2017

கமலகாசன் கணிப்பின்படி தமிழ்நாட்டில் ஜனகணமன பாடும் வரைதான் “திராவிடம்” இருக்குமா? தோழர் பெ. மணியரசன்!

கமலகாசன் கணிப்பின்படி தமிழ்நாட்டில் ஜனகணமன பாடும் வரைதான் “திராவிடம்” இருக்குமா? தோழர் பெ. மணியரசன், தலைவர், தமிழ்த்தேசியப் பேரியக்கம்.
தி.மு.க.வின் “முரசொலி” நாளிதழின் பவள விழா சென்னை கலைவாணர் அரங்கத்தில் 10.08.2017 அன்று நடந்த போது அதில் பேசிய நடிகர் கமலகாசன், “ஜனகணமன பாடல் இருக்கும்வரை “திராவிடம்” இருக்கும் என்று கூறியுள்ளார். தமிழ்நாட்டில் ஜனகணமன பாடல் பாடப்படும் வரை தான் திராவிடம் இருக்குமோ” என்ற கவலையோடு இவ்வாறு பேசியிருப்பாரோ?

அடுத்து, “திராவிடம் என்பது தமிழகத்தோடு தென்னகத்தோடு முடிந்து விடுவதில்லை; அது நாடு தழுவியது. திராவிடம் என்பது பரந்த இந்தியன் (Pan Indian). இது தொல்லியல், மாந்தவியல் அறிந்தவர்களுக்குத் தெரியும். திராவிடம், சிந்துச் சமவெளியில் தொடங்கி, மெதுவாகத் தள்ளிக் கொள்ளப்பட்டு வந்து, தேநீரில் தேயிலைச் சாறு போல் தமிழ்நாட்டில் இருக்கிறது” என்றார் கமலகாசன்.

அப்படி அவர் பேசிய போது மேடையில் வீற்றிருந்த, மு.க. ஸ்டாலின் பூரித்துப் புன்னகைத்தார். ஒரு காலத்தில் தி.மு.க. தலைவர்கள் முழங்கிய ஆரிய - திராவிட இனப் போராட்டங்களின் வரலாறு, இக்காலத்தில் கழகத்திற்குப் பழங்கால சுமையாகி விட்டது. அந்த “வரலாற்றுக் கழிவு மூட்டைகள்” கமலகாசன் கையால் இறக்கி வீசப்படுவது, இந்திய தேசிய நீரோட்டத்தில் புனித நீராடிக் கொண்டிருக்கும் தி.மு.க.விற்கு ஓர் அங்கீகாரம்தான்!

“திராவிடம் அனைத்திந்தியத் தன்மை வாய்ந்தது” என்று கமலகாசன் கூறுவது சரிதான்! திராவிடப் பெயரை வடநாட்டில் உருவாக்கியவர்கள் ஆரியர்கள். தென்னாட்டுப் பிராமணர்களைப் பஞ்ச திராவிடர்கள் என்றார்கள் அவர்கள்! தமிழர்களைத் “திராவிடர்கள்” என்று குறிப்பதைத்தான் நாம் தவறு என்று கூறுகிறோம். மற்றவர்கள் தங்களைத் திராவிடர்கள் என்றுக் கூறிக் கொண்டால், அதில் நாம் தலையிடவில்லை.

தமிழ்நாட்டில் தமிழர்கள் தங்கள் தற்காப்பு அடிப்படையில் இன உணர்ச்சி கொள்ளும் போதெல்லாம் அதை மடைமாற்றிப் பேசுவது கமலகாசனுக்கு வாடிக்கை!

இயக்குநர் பாரதிராசா தலைமையில், காவிரி உரிமைக்காகத் தமிழ்த்திரை உலகினர் நெய்வேலி அனல் மின் நிலைய முற்றுகைப் போராட்டம் நடத்திய போது, “போராட்டத்தினால் காவிரியில் தண்ணீர் வர வேண்டும். இரத்தம் வரக்கூடாது” என்றார். தென்னிந்திய நடிகர் சங்கத்தின் பெயரைத் தமிழ்நாடு நடிகர் சங்கம் என்று மாற்ற வேண்டும் என்று தமிழ் நடிகர்கள் கோரிக்கை வைத்த போது, “அனைத்திந்திய நடிகர் சங்கம்” என்று மாற்றலாம் என்று கருத்து மாற்றம் கூறினார் கமலகாசன்.

இந்திய அடையாளமும் திராவிட அடையாளமும் பின்னிப் பிணைந்து கிடக்கின்றன! சபாஷ் கமலகாசன், பூணூல் அணியாமலும் பிராமணியம் பேசலாம்!

தலைமைச் செயலகம்,
தமிழ்த்தேசியப் பேரியக்கம்

பேச: 7667077075, 9840848594
முகநூல்: www.fb.com/tamizhdesiyam
ஊடகம்: www.kannotam.com
இணையம்: tamizhthesiyam.com

போராட்டங்கள்

செய்திகள்

 
Copyright © 2013 தமிழ்த்தேசியப் பேரியக்கம்
Design by FBTemplates | BTT